Sos giornales de oe #033

Una chistione chi mancat in s’allega de su caru-allogu intre «tzitades metropolitanas» e «burgos ispopulados»
15 Maju 2023
sos giornales de oe

Si b’at una cosa chi custas dies podiat torrare a èssere chistione de agenda, ma chi non b’est intrada nemmancu essende·bi sos recuisitos istruturales e narrativos, cussa est sa de sa tecnologia aplicada a s’istrutzione, a sa formatzione, a s’istùdiu. Pro seguru, faeddende·nde, aiant pòdidu impreare sa fòrmula de sa “didàtica integrada” chi no est esclusiva e chi cumbinat presèntzia in loco e imparòngiu dae tesu. Una fòrmula fintzas galana a la nàrrere, non che a sa dad petzi da domo chi a unu fiotu de gente at fatu inchietare in tempos crìticos de gestione pandèmica. Immaginemus·nos unu tìtulu artìculu o de servìtziu, o una decraratzione virguletada tipu “La dad in alternativa al caro affitti” pro cumprèndere cantu diat pòdere èssere fartosu s'impreu de cussa sigla. Ma sulenos abarremus chi tantu, integrada o dad, nemos at faeddadu de tecnologia pro sos istudiantes. Gasi etotu oe. In La Nuova Sardegna b’at unu pàrrere in prima pàgina (sighit a sa de tres) chi faeddat de ispesas familiares fintzas pro sos pitzocos chi istùdiant in Tàtari o in Casteddu («sas duas tzitades metropolitanas»...metropolitanas...). Una crìtica generale contra a sa polìtica e una particulare a su ministru Valditara chi (particulare fintzas issu) aiat criticadu pro parte sua sos sìndigos de manca de sas tzitades universitàrias. E nemmancu dae s’abertura de l’Unione sarda («Servìtzios digitales, Sardigna coigiada») nche lompimus a sa chistione pesada inoghe; e puru in sas matessi pàginas si faeddat de istudiantes e de formatzione. Ma si est beru su chi narat La Nuova, chi fintzas in Tàtari e Casteddu sos allogos sunt caros, pro ite (in prus de una polìtica abitativa generale pro traballadores e istudiantes e in prus de una polìtica de sos trasportos dèghida) non pensamus finamentas a una universidade ispainada peri sos logos cun letziones in ambas maneras? A banda sos esames e sas atividades laboratoriales e pràticas, podimus pensare a formas chi permitant a sos pitzocos de si nch’abarrare in logos issoro (chi poi tantu est a lèghere de «burgos ispopulados»...burgos...) pro s’annestru teòricu? O in logos serentes, nessi. Pro ite sos polos universitàrios de Nùgoro, Aristanis e Terranoa non diant pòdere àere àulas multimediales pro assìstere a sas matessi letziones umanìsticas e giurìdicas chi faghent in Tàtari e Casteddu? O semus timende de nche bogare gente dae su mercadu immobiliare "metropolitanu"?

© RIPRODUZIONE RISERVATA