Sos giornales de oe #037

Dae·nos·la mèngua nostra die cun die. Sed libera nos a malo. Amen
23 Maju 2023
sos giornales de oe

Si eris amus bidu chi b’at mèngua manna in sos ambulatòrios, oe bidimus chi gasi no est pro sos cunfessionales mancari sa crisi de sas vocatziones. Lu narat unu giòvanu preìderu de Arriora (pastorighende ànimas in Tramatza e Bauladu) intervistadu dae su diretore de L’Unione sarda. Unu preìderu de 31 annos chi deviat istudiare Meighina e chi su babbu lu cheriat dutore. B’at una parte de s’intervista – bene sestada e chi si lassat lèghere – chi a una pregonta cun in intro finas su sìndigu e su cumandante de sos carabineris, su retore rispondet narende chi ei, chi su pàrracu est unu puntu de riferimentu pro sas comunidades: «Dia nàrrere chi emmo, ma no est gasi pro su dutore; a bi l’àere in sas biddas nostras». Ite àteru est chi mancat a s’apellu? La Nuova Sardegna faeddat de sos geòmetras dende boghe a chi est proponende «unu patu de ferru intre sa Consulta provintziale de sos fràigos (corporatzione padronale-sindacale, ndr), su collègiu de sos geòmetras e sos polos tècnicos» pro chi non manchet custa figura in unu setore in ue sos traballadores sunt aumentados de su 39% e sas impresas ediles de su 22. Chi b’apat prus gente in seminàriu chi no in sas iscolas? At a èssere pro cussu chi una de sas propostas est s’abertura de cursos serales de sas superiores? Colemus·nche como a s’Universidade. Ite mancat in cue? Su psicòlogu (chi no est unu cunfessore). Est cosa contada dae ambos giornales pro mèdiu de una proposta regionale de sos Progressistas (ma est cosa chi naschet dae sos assòtzios de sos istudiantes) pro pònnere rimèdiu a sos anneos e a sos discumbènios de una comunidade de giòvanos chi, si non si ghetat a nàrrere missa, deretu nche sunt in intro de un’ambiente cumpetitivu cando chi diat dèvere èssere formativu. A propòsitu de cumpetitzione, sos giornales aberint cun àteru, cun sos faeddos de su presidente de Confindùstria in missione in Sardigna. Leghide·bos·lu. Deo apo giradu pàgina deretu. A cras.

m.p.

 

© RIPRODUZIONE RISERVATA