Sos giornales de oe #29
Chida interinende·si·nche ma allega aeroportuale semper arta in chelu che chi esseremus galu a mesudie. Sa Regione chi negat su via lìbera a sa fusione intre sas sotziedades de gestione de S’Alighera e Terranoa e sa Cgil chi non cheret a privatizarent s’iscalu de Casteddu est su chi, pagu prus o mancu, si contat dae carchi chida (oe L’Unione aberit cun custa cosa). Non b’at nudda de nou, finamentas ca si su chelu fiat in terra l’ant serradu giai dae meda.
Ca sa chistione de sa libertade de movimentu dae e pro custa terra infusta non pertocat sos logos de mòvida e de lòmpida ma fintzas sas àeras e sas cumpangias chi determinant prejos pro chie biàgiat e pagas pro sos dipendentes. De totu custu non paret chi si nde faeddet in intro de sas coalitziones.
A bisu de carchi esponente de tzentru manca diat pàrrere chi in intro de sa majoria de tzentru dereta Solinas non tèngiat sas matessi ideas de àteros in cussa coalitzione. Est diplomàtica sa serrada de su consigeri regionale Mauro Tedde, ex sìndigu de S’Alighera, ma forsis est su chi non si leghet su chi pesat: «Reconnoschimus s’atzione de s’assessore Moro, ma est craru chi tocat a su presidente Solinas a chistionare cun F2i a inditare sa diretzione e a sestare su caminu. E tèngio resones bonas pro nàrrere chi l’at a fàghere». Comente a nàrrere: move·ti, dae·ti cuidadu!
E però in su tzentru manca ite narant? A su presente su de si darent cuidadu pertocat su fràigu de s’alleàntzia, comente contant ambos sos giornale sardos oe in edìcula. Cu Alessandra Todde in Assèmini sighende s’alleàntzia Pd-M5S conca a sas Comunales e cun sos consigeris sardos pentisteddados a ue su Conte agiornende·lu de su chi b’at a rodeu inoghe. Su fronte mannu est prontu, ma at a bolare? E ite at a nàrrere pro sos chi imbetzes devent bolare e sunt leghende sas àteras crònacas mentovadas?
In su mentres sos giornales italianos faeddant de unu disafiu Itàlia – Frantza, su chi pertocat sa gestiones de sos migrantes, de cussos chi non benint bolende, non su fùbalu. In contu de isport sos tìtulos sunt pro sa vitòria definitiva de su Nàpoli. Nessi como podimus faeddare de rèdditu de tzitadinàntzia e non de baguette e de bidet.