Su Rally de Itàlia arribat a Sardigna

Aprofundimentu de su chenàbura - Su Rally de Itàlia arribat a Sardigna. Ant a èssere 74 sos pilotas in gara.

Sa de ses firmadas de su mundiale s'at a isboligare in Gaddura, a manera pretzisa in Terranoa, dae su 1 de su mese de làmpadas a su 4 de su mese de làmpadas.

S'addòbiu isportivu est organizadu dae S'"Automobile Club d'Italia".

Bator dies de isport, duncas, ant a atraessare sos caminos de su territòriu gadduresu, chi ant a àere comente protagonistas 20 comunas: Aglientu; Alà; Altzaghena; Boltizadas; Buddusò; Calangianus; Èrula; Lòiri Portu-Santu Paolu; Locusantu; Monte; Terranoa; Oscheri; Otieri; Padru; Su Parau; Patada; Peifugas; Lungoni; Tèmpiu; Tula.

Una manifestatzione isportiva importante, chi biet su traballu de milli persones, e chi at un'àndala de 1.170 chilòmetros, 322 chilòmetros partzidos in 19 proas ispetziales.

Sos nùmeros de su Rally de Itàlia non sunt acabados inoghe. Difatis sunt 74 sos echipàgios iscritos in rapresentàntzia de 27 Paisos. Sa gara at a tzucare dae Terranoa. Semper in Terranoa est prevìdidu s'abbadòrgiu.

Posca de s'ùrtima proa chi s'est isboligada in Portogallu, in cùcuru de sa classìfica de su mundiale b'est Kolla Rovanpera cun sa Toyota. Duncas, pro sobrare in sa classìfica, sa Ford de Ott Tanak e sas àteras Toyota de Sebastien Ogier e Elfyn Evansa ant a dèvere gherrare contra a sa Kolla Rovanpera.

No est totu. Su Rally de Itàlia in Sardigna at a àere finas una cobertura de sa tv italiana desemplada, chi s'at a summare a sa "live" internatzionale de "Wrc+". Sa Rai at a trasmìtere chimbe proas ispetziales, de custas una s'at a pòdere bìdere in direta in su canale Rai 2.

S'àndala de su Rally de Itàlia s'at a isboligare pro su prus in sos territòrios gestidos dae s'"Agenzia Regionale Forestas", e, pròpiu gràtzias a sa collaboratzione cun s'Agentzia, s'ant a pòdere connòschere finas sas bellesas sardas in campu forestale.