Basket: Stanley Whittaker cun sa "Dinamo"

Aprofundimentu de su chenàbura - Pro s'istajone imbeniente su "playmaker" istadunidensu Stanley Whittaker at a ghiare su giogu de sa de sa tataresa "Dinamo Banco di Sardegna".

Su giogadore, chi at 29 annos, benit dae Philadelphia, tzitade de sa Pennsylvania. Stanley Whittaker, lu ammentamus, in s'annu coladu at bestidu sa màllia de sa Wurzuburg, s'iscuadra de basket chi rapresentat sa tzitade tedesca omònima. Ocannu, imbetzes, comente si podet cumprèndere, at firmadu unu cuntratu cun sa sotziedade tataresa. Sotziedade chi, a pustis de s'abbandonu de Dowe e Robinson, fiat chirchende unu "playmaker".

In s'ùrtima istajone chi at giogadu in Germània, Whittaker at serradu cun prus de 18 puntos e 5 "assist" de mèdia.

No est pro nudda ca, in sas istatìsticas fatas dae sa lega tedesca, Stanley Whittaker est resurtadu tra sos 5 giogadores mègius de su campionadu, cun mentovos particulares in sa difesa, s'efetu in s'atacu (at giogadu 50 poderios a partida tra tiros, "assist", tiros lìberos, fartas sufridas) e sa capatzidade de creare pro sei e pro sos cumpàngios. No est totu, pro ite Stanley Whittaker est istadu finas Mvp ("Most Valuable Player") de su mese de martzu. Difatis pro 16 bias at realizadu prus de 20 puntos, iscriende 37 puntos in su "match" bìnchidu in Bamberg, Baviera.

Stanley Whittaker - comente sutalìneat su "general manager" de sa "Dinamo Banco di Sardegna" Federico Pasquini - est istadu su primu issèberu chi ant fatu sos dirigentes de s'iscuadra de basket tataresa. A los incantare est istadu su giogu in campu, unu giogu de calidade siat dae su puntu de annotu tècnicu siat dae su puntu de annotu de su caràtere de su giogadore, chi s'est dimustradu unu gherradore tostu a cumbatere, "unu play beru, unu giogadore chi at gana de crèschere e de fàghere semper mègius", at pretzisadu Pasquini, chi faeddende de Whittaker sighit - "est unu giogadore chi còjuat a manera perfeta sas possibilidades nostras in su mercadu cun sas esigèntzias nostras".

Stanley Whittaker est istadu sighidu dae tempus meda dae sa sotziedade tataresa, ducas cando sa "Dinamo Banco di Sardegna" at àpidu bisòngiu de unu "playmaker" l'at chircadu.