Conca a sa Die mundiale de su rifugiadu

Aprofundimentu de su mèrcuris  - La tzelebramus cada annu su 20 de làmpadas, duncas martis chi benit. Sa Die mundiale de su rifugiadu la decrareint su 2001 in ocasione de su de 50 anniversàrios de sa Cunventzione de su 1951, carta in ue b’agatamus sa notzione matessi de rifugiadu. Est a nàrrere «cale si siat persone chi non podet o non cheret torrare a su paisu suo pro more di timòria funduda de èssere persighidu pro chistiones de etnia, de religione, de apartenèntzia a unu grupu sotziale particulare o de opinione polìtica». A su presente unu rifugiadu est finamentas una persone disamparada pro more de degòllios naturales comente unu terremotu, unu tsunami, un’erutzione vulcànica.

Cunforma a sos contos in manu nostra b’at unos 280 milliones de migrantes peri su mundu e nessi 100 sunt rifugiados. Duncas non totu sos migrantes sunt rifugiados, sende chi b’at chie movet ca sèberat de lu fàghere pro àteros motivos. Ma custa est una diferèntzia chi petzi una visione reatzionària de sa sotziedade impreat pro partzire sa gente: cando narant chi “non sunt fuende dae sa gherra” (mancari a bias gherra b'apat) sunt narende chi non cherent sos migrantes econòmicos, che chi non siat una gherra sa de chircare traballu in tretos issoro o chi no lu siat sa chi devent fàghere biagende inghiriados dae milli perìgulos. De prus, est una còntiga chi non pigat in cunsideru sos de custos logos chi, mancari cun conditziones mègius de àteros migrantes econòmicos, si nche fuint dae inoghe. Duncas custa die de su 20 non siat un’iscusa pro criminalizare sos chi ponent in perìgulu sa vida issoro pro unu benidore de garantzias.

Torrende a sos rifugiados, oe sas crisis prus mannas pertocant sa Sìria, s’Ucraina, su Sudan meridionale, s’Afghanistan. Ma fintzas inoghe b’at chie cuntestat sa bènnida issoro sena documentos – sena cumprèndere sas resones a palas – faeddende in curtzu de “clandestinos”. Nemos si nche cheret fuire dae domo, nemos lu faghet cuntentu. Tando cheret chi bivamus custa die movende dae s’empatia e dae sa cherta de cumprèndere su proite.