MUACC: finas a su 28 de su mese de trìulas sa mustra dedicada a sos traballos de Pinuccio Sciola

Aprofundimentu de su lunis - L'ant aberta su 16 de su mese de maju coladu e at a sighire finas a su 28 de su mese de trìulas chi at a bènnere. Semus faeddende de sa mustra dedicada a s'artista Pinuccio Sciola intitulada "Era una foresta".

S'espositzione s'agatat in sos aposentos de su MUACC, est a nàrrere su Museu Universitàriu de sas Artes e Culturas Contemporàneas de s'ateneu casteddaju, e est istada organizada dae sa Fondazione Sciola. Tema de sa mustra est sa relatzione de s'òmine cun s'ambiente naturale, una chistione chi est semper prus atuale in custu momentu istòricu e peri unu tema chi est istadu de importu mannu in totu sa produtzione de s'artista de Santu Sparau.

S'espositzione presentat unu messàgiu forte, chi faeddat de amparu de s'ambiente e de sustenibilidade ambientale. Gosi, sa mustra presentat unu progetu cun disinnos, fotografias, fotomontàgios e annotaduras iscritas dae s'artista etotu. Importante, in sas òperas paradas, est su tema de sa distruidura de sos padentes. Sa primu òpera in mustra, cando su bisitadore intrat in sos aposentos de su MUACC, est intitulada pròpiu "Era una foresta" e est custu traballu de Sciola a dare su nùmene a totu su progetu.

S'espositzione est su resurtu de sa collaboratzione tra su MUACC e sa Fondazione Sciola e s'insertat in sas initziativas culturales de su Festival Sant'Arte, manifestatzione chi ocannu lompet a sa de ses editziones. In ocasione de s'abertura sua, sa mustra est istada inchingiada dae sa Professora Rita Pamela Ladogana, chi est finas sa referente iscientìfica de su Museu, e dae sa Professora Simona Campus, est a nàrrere sa curadora de su MUACC.

Tocat finas a sutalineare ca cun custu progetu artìsticu su Museu Universitàriu de sas Artes e Culturas Contemporàneas de s'ateneu casteddaju sighit cun s'impignu cosa sua: su de aprofundire chistiones de su mundu de oe.

S'intrada a s'espositzione "Era una foresta" est a indonu.