Presentadu su programma de su Dromos Festival 2023

Aprofundimentu de su chenàbura – Sa nova est de carchi die faghet. Semus faeddende de sa presentada, su 14 de su mese de làmpadas coladu, durante sa cunferèntzia de imprenta in sos aposentos de su Ros’e Mari Farm & Greenhouse, de su programma de su Festival Dromos - editzione 2023, sa manifestatzione de mùsica chi at su nùmene de s'assòtziu chi la organizat e chi interessat unas cantas biddas de sa provìntzia de Aristanis.

S'editzione de ocannu de su Festival, chi afestat sos bintighimbe annos cosa sua, at a torrare dae su 28 de su mese de trìulas a su 14 de su mese de austu chi ant a bènnere.

Sa manifestatzione culturale, comente semper, at a tocare diversas comunidades: s'at a mòvere dae Aristanis pro lòmpere a Donigàla, at a arribare a Fordongianus, at a tocare Mragaxòri, s'at a firmare in Neunele, in Crabas, at a lòmpere a Ortueri, in provìntzia de Nùgoro, e at a torrare in dae segus, a Nureci, in sa regione de sa Marmidda. Sa bidda marmiddesa at a saludare sos primos bintighimbe annos de su festival musicale cun sa torrada de su “Mamma Blues”. Custa, duncas, est giai una nova de importu mannu pro totus sos amantiosos de sa mùsica blues.

Ocannu puru su Festival Dromos at a presentare mundos musicales diferentes e pro mèdiu de sa mùsica at a fàghere su giru de su mundu intreu. Su tìtulu de s'editzione de su 2023 est “People”, e difatis sos addòbios ant a èssere multi-ètnicos, ant a faeddare de incluidura culturale a ant a àere sa punna de torrare a prenare de zente sos territòrios marginales. Unu progetu importante, duncas, chi dat importàntzia a sas comunidades e las faghet èssere protagonistas de unu caminu de interessu mannu. Gosi in su palcu amus a bìdere artistas famados in totu su mundu: dae sos Manhattan Transfer, chi ant a sonare su 29 de trìulas in Aristanis, a Abdullah Ibrahim, chi at a èssere in S. Giovanni de Sinis su 1 de austu, dae Tigran Hamasyan, nùmene nodidu de s'universu jazz, a Chano Domínguez, chi at a sonare in Donigàla. Sos nùmenes sunt galu medas: su de su grupu The Original Blues Brothers Band, su de Marino De Rosas, su nùmene de Denise Gueye. E galu: Lady Blackbird, Cécile McLorin Salvant, Stefano Bollani, The Comet is Coming, Alfa Mist, Francesco Piu e Big Daddy Wilson.