Sa Sanidade in su pallone

Est cosa chi amus bidu faghende sa rassigna de sos giornales custas dies. Ma est cosa chi at a èssere ogetu de allega pro paritzu tempus si non pro totu canta sa campagna eletorale. Semus faeddende de sos bator ospidales noos comente podimus bìdere in sa delìbera de Giunta regionale de su primu de làmpadas. Semus faeddende de bator istruturas chi galu sunt a ischire in ue cherent fraigadas: una in Tàtari (su Santissima Annunziata 2), una in s’Alighera (ghetende a pare su Tzivile e su Marinu), una in su Sulcis (in càmbiu de su Sirai de Carbònia e de su Santa Barbara de Igrèsias) e una in Casteddu (cando chi como bi sunt su Businco e su San Michele-Brotzu). S’assessore Doria narat chi su dinare b’est: «Est dae tempus chi ischimus chi cun sos rispàrmios dae sos acantonamentos (nessi 480 milliones cada annu) e àteros fundos natzionales e europeos a disponimentu pro sas infrastruturas, no at a èssere cosa difìtzile pro nois ghetare a pare su chi nos serbit». Ma est beru finamentas chi de custa manera si blocant sos traballos (cun su dinare chi b’est) pro s’ammodernamentu de su Brotzu: 25 milliones de fundos europeos, 40 milliones de fundos regionales (de su 2017, Giunta Pigliaru); de prus, b’at unu primu apaltu de 5 milliones agiudicadu a concruos de s’annu coladu. Pro custa cosa sunt protestende sos sindacados ca b’at traballos giai comintzados; est protestende s’opositzione chi faeddat de dannu erariale; e protestas b’at finamentas in sas corsias comente leghimus in sos giornales. Ma galu non s’ischit in ue cherent fraigados custos ospidales. Doria narat chi no est cumpetèntzia sua: «Intro de austu sas Aziendas (Ares, Aou, Asl, ndr) nos ant a dèvere imbiare sas conclusiones (sa documentatzione de sas àreas idòneas, ndr) a pustis chi si sunt cunfrontadas mescamente cun sos Comunes interessados, ca nudda amus a impònnere dae artu». E s’istàdiu? Ite b’intrat s’istàdiu de su Cagliari? B’intrat ca est faeddende de acòrdios Regione-Comune chi est essida a campu sa noa (sa prima chida de làmpadas) de s’ospidale. Est tando chi sos progressistas in Regione nergeint chi «sa Regione at vinculadu su Comune a sutascrìere un’acòrdiu in ue b’at de totu, fintzas un’ospidale chi nemos ischit in ue l’ant a fàghere”». Posca, mancari de carchi die in antis, amus ischidu de sa delìbera de sos bator ospidales in Sardigna. E como ischimus chi Solinas, faeddende cara a sas telecàmeras de Videolina, at dadu garantzias chi s’istàdiu giai l’ant a fàghere. Ma in ue?