Sàbadu 10 de su mese de làmpadas sa tzerimònia chi aberret s'annu acadèmicu penitentziàriu

Aprofundimentu de su lunis - Su 10 de su mese de làmpadas coladu, in su presone de Uda est istadu inchingiadu s'annu acadèmicu de su "Polo Penitenziario" de s'Universidade de sos Istùdios de Casteddu, chi est nàschidu in su 2018. At cumentzadu sos traballos de sa die sa Professora Maria Francesca Cortesi, chi insinnat Deretu protzessuale penale in s'ateneu casteddaju e chi at presentadu una relata subra sa giustìtzia penale. Una chistione chi est istada agradèssida meda a sos presoneris de Uda.

Sa punna de s'Universidade est sa de dare a sos detenudos sas matessi oportunidades de istùdiu chi ant sos àteros istudiantes de s'ateneu. Est cantu at sutalineadu su Retore de s'Universidade de Casteddu Francesco Mola.

Pro sa tzerimònia fiant presentes finas Marco Porcu, est a nàrrere su Diretore de su presone de Uda; Cristina Ornano, Presidente de su Tribunale de bardiamentu; Cristina Cabras, sa Delegada de s'Universidade de Casteddu in su CNUPP ("Conferenza Nazionale delle Delegate e dei Delegati") e Franco Prina, Presidente de su CNUPP.

Durante sa tzerimònia est istadu fatu peri unu collegamentu cun su presone "Casa di Reclusione Salvatore Soro" de Massama.

Tocat a pretzisare ca sa tzerimònia de su 10 de làmpadas est istada antitzipada, s'8 e su su 9 de làmpadas etotu, dae sa cunferentzia natzionale de sas Delegadas e de sos Delegados de sos Retores pro  sos Tzentros Universitàrios Penitentziàrios e ca custa cunferèntzia rapresentat unu logu importante de acaramentu e e crèschida pro totus sos sos presones chi acasàgiant sos cursos de s'Universidade.

Bellas sas paràulas de su Retore Mola, chi a sos detenudos at naradu ca sa primu làurea de unu presoneri de su presone de Uda, in su mese de cabudanni 2022, est un'ammentu de importu pro ite est un'obietivu chi est istadu segudadu: su de dare a sas persones chi ant una limitatzione de sa libertade issoro sa possibilidade de fàghere sas matessi cosas chi faghent sos àteros istudiantes de s'Universidade.