Sos campos iscola de sa Protetzione tzivile

Est pro comintzare sa de trèighi editziones de su progetu “Anch’io sono la protezione civile” organizada dae su dipartimentu natzionale in pare cun sas Regiones, sa Provìntzia autònoma de Boltzanu e sas organizatziones natzionales e locales de voluntariadu.

Sa punna de su progetu est sa de ispainare cussèntzia in sos pitzocos cunforma a su ruolu issoro pro s’ambiente, su territòriu e sa colletividade pro mèdiu de esertzitatziones pràticas, atividades lùdicu-recreativas e cunfrontu didàticu. B’ant a pigare parte 6 organizatziones iscritas a su registru regionale de Protetzione tzivile cun pitzocos dae sos 10 a sos 16 annos. Sas atividades comintzant su 3 de trìulas cun su primu campu-iscola in Uras. A pustis at a tocare a Ìsili, Orosei, Serdiana, Assèmini, Serrenti, Gavoi e, in fines, Codaruina. Pro info prus a minudu: bit.ly/CSRAS23

m.p.