Animalistas denùntziant: agressione de sos canes a sos muvrones

Aprofundimentu de su lunis - In Fìgari si pesat sa boghe de sos animalistas chi denuntziant s'agressione a sos muvrones. A los agredire sunt sos canes aunzados cun probabilidade dae sos meres.

Gosi, sa presidente de s'assòtziu "Lndc Animal Protecion" Piera Rosati at iscritu una lìtera a su primu tzitadinu de Fìgari Mario Mulas, in ue acrarat ca "su sìndigu devet adotare provedimentos pro compidare sa situatzione e controllare ca sos canes siant leados a sa surra a manera currègida, comente est prevididu dae sa lee".

Sos muvrones, s'ischit, sunt animales chi arriscant s'estintzione. Duncas s'incolumidade issoro, sutalìneant sos de s'assòtziu "Lndc Animal Protection", no est semper tutelada comente si devet. Pro custa resone s'assòtziu at leadu sa detzididura de denuntziare su chi sunt bivende sos muvrones de Fìgari.

Sa populatzione de sos muvrones chi bivet lìbera in su territòriu comunale de Fìgari, in sas dies coladas at sufridu un'àtera agressione. A pustis de àere bìvidu s'agressione: una muvrone fèmina est istada agatada morta in logu de arroca "cun onni probabilidade - pretzisat s'assòtziu 'Lndc Animal Protection' a ANSA - pro more de s'agressione de canes lassados lìberos e sena de musarola". S'afirmadura de s'assòtziu est fundada in subra de sos sejos fatos dae sos residentes chi afirmant de àere bidu custos canes.

A canto paret, dae sos contos issoro carchi mere s'ispàssiat meda a atitzare sos canes contra a sos muvrones, una ratza de animale chi s'agatat in pagu logos in Sardigna e finas in Itàlia.

No est totu. "Sa populatzione de sos muvrones chi s'agatat in Fìgari - acrarat s'assòtziu 'Lndc Animal Protection' - carchi annu dae como est istada degumada dae unu fogu mannu meda, chi aiat distruidu su prus de su territòriu a inghìriu de s'àrea de Cabu Fìgari, logu in ue sos muvrones bivent.

Dae tando su traballu de sos biologos e su de sa Guàrdia Forestale pro salvaguardare sa ratza est istadu unu traballu sena de pasu.