Basket in carrotzina, torrant sos Bads

Aprofundimentu de su mèrcuris - Mancant in s’iscena natzionale dae su 2011, cando lompeint a sa de tres positziones in classìfica in sèrie A1. Est dae tando chi sos Bads (est a nàrrere Basket Disabili Sardegna) no ant giogadu una gara ufitziale de basket in carrotzina, ma s’atividae issoro est sighida cun s’aficu de s’annestru e cun su gosu de unas cantas dimustratziones.

In sos pianos de sa sotziedade de Quartu, chi dae s’annu coladu est presèdida dae Alberto Garau, b’est sa partetzipatzione a su campionadu natzionale Uisp.

Pro custu est chi sa dirigèntzia de s’iscuadra ruju-mìscrina at aprontadu una regorta de fundos online pro mèdiu de GoFundMe pro sustènnere sas ispesas de sas trasfertas in s’àtera ala de su Tirrenu. «Nch’at coladu tempus meda dae s’ùrtimu disafiu – narat Garau – e duncas est prus chi non mannu su disìgiu de torrare a rapresentare sa tzitade in una cumpetitzione de casta natzionale.

Pro lu fàghere est fundamentale s’agiudu de sa tzitade e de sos imprendidores locales, ca sena sponsor no est fàtzile a sustènnere sos gastos pro sa trasferta: billetes de sos aèreos o de sa nae, pernotamentu eventuale e nolègiu de sos mezos pro su trasportu de sos disàbiles e de sas carrotzinas pro passìgiu e pro su giogu. Sas risorsas nostras non bastant, pro custu lu naramus a sos cuartesos, e no a issos ebbia, pro chi nos agiudent. E custa – annanghet Garau – est pro me ocasione de torrare gràtzias a totu sos chi, a pustis de sa fura de s’atretzadura. Est cosa chi nos at fatu praghere». Peristantu sos Bads, in cherta de torrare a su PalaBeethoven de Quartu, dae belle un’annu s’annestru lu sunt faghende in Biddaramosa. De prus, como sunt impignados in unu giru promotzionale in Macumere, Santu Sparau, Senobrì, Ceraxius, Quartu e Casteddu. «Cherimus fàghere connòschere custu isport galanu – at serradu Garau – e in su matessi tempus chircare atletas pro giogare a basket in carrotzina mancari sena àere disabilidades fìsicas».