Limba sarda. Una sessione noa de tzertificatzione C1

Aprofundimentu de su mèrcuris - Pro mèdiu de una determinatzione de su 30 de su mese coladu, s’Assessoradu de s’Istrutzione pùblica at aprovadu s’avisu pùblicu pro una sessione noa de tzertificatzione linguìstica pro sa connoschèntzia de sas limbas de minorias istòricas.

Semus faeddende de su livellu “C1” chi ant comintzadu a iscumproare s’annu coladu. Custa diat dèvere èssere sa prima de àteras tres, cunforma a su chi leghimus in un’àteru avisu, su chi pertocat sos isportellos linguìsticos e chi narat «in su mentres chi s’acumprat a àteras tres sessiones de tzertificatzione provisòria e isperimentale [...] sos operadores devent èssere in possessu de unu livellu avantzadu de connoschèntzia, esperièntzia, padronàntzia e cumpetèntzia linguìstica [...] a unu livellu agualadu a su C1 de su Qcer».

Duncas bator in totu contende sa de s’annu coladu? Gasi diat dèvere èssere. Pro como s’Assessoradu at inditadu sa data de su 18 de cabudanni cun proas in Casteddu in sas àulas Turing, Belloni e Lab. 58 de su Polu umanìsticu "Sa Duchessa" in carrera de Is Mirrionis 1. «Si pretzisat – leghimus in s’avisu – chi sa tzertificatzione de sa connoschèntzia de sa limba sarda cun livellu C1 at a costituire una premialidade in sas protzeduras de seletzione aprontadas dae sos Entes territoriales pro individuare sos operadores de isportellos linguìsticos e de sa formatzione [...] e tìtulu de ammissione pro s’iscritzione a s’Elencu de sos dotzentes e pro pòdere insegnare comente dotzentes esternos cualificados».

Sas dimandas las ant a registrare cunforma a s’òrdine cronològicu de lòmpida e ant a èssere ammìtidos a sustènnere sas proas sos candidados cun dimandas ammissìbiles finas a sas 150 unidades. Custas sunt sas setziones de sas proas: unu test de iscurtu (cumprensione de test orales); unu test de cumprensione de testos iscritos; unu test de anàlisi de sas istruturas comunicativas; unu test de produtzione iscrita; unu test de produtzione orale. Sa dimanda cheret imbiada intro de mesudie de su 31 de làmpadas pro mèdiu de pec pi.cultura.sarda@pec.regione.sardegna.it.