Sènnaru est su "Comune rifiuti free" mègius de s'ìsula

Aprofundimentu de su lunis - Tra sas comunas chi ant una populatzione tra sos chimbe mìgia abitantes e sos 15 mìgia abitantes Sènnaru est su "Comune Rifiuti Free" mègius de s'ìsula. A lu premiare est istadu s'assòtziu ambientalista italianu "Legambiente".

Difatis, sa comuna de sa provìntzia de Tàtari est istada premiada dae su cuncursu natzionale "Comuni ricicloni".

Su cuncursu "Comuni ricicloni" naschet dae un'idea de "Legambiente" cun su patrotzìniu de su "Ministero dell'Ambiente e della Sicurezza Energetica" e su de saRegione Làtziu, e  in collaboratzione cun "Conai", "Conoe", "Comieco", "CoReVe", "CoRePla", "CiAl", "Ricrea", "Rilegno", "CIC", "Biorepack". "Partner"  de su prèmiu "Novamont", "Ecomondo" e sos giornales "Rifiuti Oggi" e "La Nuova Ecologia".

Cun "Comuni ricicloni" sa Comuna de Sènnaru batit a domo unu prèmiu pensadu pro sas comunas chi ant una produtzione de collidura non diferentziada destinada a s'eliminatzione.

Sa bidda in provìntzia de Tàtari, difatis, s'est fata notare gràtzias a sos resurtados importantes cunsighidos in sa collidura de s'arga. Est a nàrrere gràtzias a una produtzione a conca de collidura non diferentziada de 64,8 chilos a s'annu e a una cuota de collidura diferentziada de 79,9%.

Unu prèmiu importante, chi - comente sutalìneat  ANSA - est istadu retzidu, su 6 de su mese de trìulas 2023 pro sa de tre dies de s' "Eco-Forum 2023", dae sa cussigera comunale cun dèlega a s'Ambiente Pina Pazzola pro sa tres dies de s'"Eco-Forum 2023".

Pazzola, in rapresentàntzia de s'amministratzione comunale de Sènnaru, at leadu parte a sa tzerimònia ufitziale de "Legambiente" chi, in sas dies coladas, s'est isboligada in Roma.

A pustis de sa tzerimònia, sa cussigera comunale Pina Pazzola cummentat su prèmiu retzidu dae "Legambiente" cun paràulas importantes: "est unu prèmiu chi dedicu a sos cuntzitadinos meos, est a issos chi torro gràtzias" - e pretzisat - "sunt issos chi ant fatu custu resurtadu" issos "cun sa sensibilidade a sos temas ambientales" issos "cun su respetu de sas regulas" - e concruit "nos amus a impignare pro fàghere galu mègius in su tempus benidore".