Isetende s'Inter a istàdiu prenu

Postu in archìviu su parègiu in trasferta contra a su Torino, su Cagliari s’est preparende pro retzire lunis a Casteddu sos nieddu-biaitos de s’Inter. Sa partida, sa segunda de su girone de andada de s’istajone in pessu comintzada, l’at a dirìgere Michele Fabbri, àrbitru internatzionale de sa setzione de Ravenna. In pare cun issu sos assistentes Luca Mondin e Damiano Di Iorio (Giovanni Ayroldi su de bator òmines, Valerio Marini e Salvatore Longo di Paola a su Var).

Sos logos a sètzere de s’Unipol Domus sunt giai belle prenotados. In contu de tifu dae sas gradinadas su datu finale pro ocannu nche crompet a 13.431 abbonados. S’Inter, chi at bìnchidu contra a su Monza in sa prima gara de ocannu, est in prima positzione in pare cun Fiorentina, Juventus, Napoli, Milan, Atalanta, Lecce e Verona. Frùschiu de comintzu a sas 20.45.

m.p.