Mare e canes: sa tzivilidade de su Sinis

Aprofundimentu de su chenàbura - Finas in su 2023 est una tzertesa batire su cane in sa penìsula de su Sinis sena de incùrrere in santziones. Su Sinis, difatis, aberit bator plàias pro sos canes. Sa nova bella si leghet in un'artìculu Ansa de su 16 de su mese de austu 2023.

Duncas ocannu puru sunt istadas cunfirmadas e abertas sas bator àreas dedicadas a sos amigos a bator brancas. Sunt àreas cherridas dae s'amministratzione comunale de Crabas.

Sas plàias pro sos canes s'agatant in "San Giovanni di Sinis", "Maimoni", "Portu S'uedda" e "Funtana Meiga". Sas "dog friendly beach" sunt indicadas dae cartellos e sunt alindadas cun funes e pilotos; ant una mannària de 1500 metros cuadros onniuna e, gràtzias a un'ordinàntzia comunale, sunt giai ativas.

Sas "dog friendly beach" dant sa possibilidade a sos chi ant canes de si mòvere cun s'animale de domo sena arriscare multas. Custos sunt logos netzessàrios, pro ite in su territòriu sardu est in vigèntzia un'ordinàntzia chi proibit de giùghere animales in s'arenile.

Ma cale est regulamentu de sas plàias lìberas dedicadas a sos canes? Custas plàias sighint una pariga de regulas. Difatis si podent impitare dae s'arbèschida a s'intrinada de su 30 de su mese de làmpadas a su 30 de su mese de cabudanni 2023; sunt logos in ue podent intrare sos canes vatzinados e iscritos in s'anàgrafe de sos canes; onni duas oras sos animales devent èssere batidos a foras de s'àrea pro fàghere una passigiada; sos canes devent èssere frunidos de sa guturada cun sa madalliedda de identificatzione. Sa madalliedda at a dèvere àere sos datos de su mere de su cane.

Galu, sos chi batint su cane in custos logos lìberos devent àere cun sei una corria pro leare s'animale in fatu. Sa corria devet àere una longària de unu metru e mesu màssimu. No est totu, pro ite su mere de su cane devet àere cun sei finas una musarola de impitare in casu de netzessidade.

In fines, sos meres de sos canes ant s'òbligu de creare umbra pro sos animales issoro. Sos canes ant a pòdere finas intrare a mare in sas àreas antales a sas àreas "dog friendly", ma l'ant pòdere fàghere feti si sunt bardiados dae sos meres.