Edustrada, su progetu de su Miur. Cosa de importu fintzas pro sos giòvanos sardos

Aprofundimentu de su mèrcuris - Si narat Edustrada, est a nàrrere unu progetu ministeriale de su Miur pro promòvere in sas iscolas s’educatzione istradale.

Su dicasteru de s’istrutzione, cun sa punna de sensibilizare sos giòvanos, at aprontadu sa prataforma omònima edustrada.it proponende un’ispàtziu interativu pro sos istudiantes e sos dotzentes de cada òrdine e gradu cun tecnologias noas a tretu de los interessare mègius.

Sas iscolas si podent registrare in sa prataforma mentovada e aderire a sos progetos de interessu in sa setzione “Offerta formativa” e compilare, in su contu pròpiu, su monitoràgiu de adesione e su cuestionàriu de valutatzione, a pustis de sos concruos de su progetu.

Sas iscolas podent aderire cada annu, su mese de santugaine, a s’oferta formativa de Edustrada pro achirire una cussèntzia prus manna in contu de cumportamentos de sighire guidende, ma finamentas andende a pee, in bitzicreta, in motorinu fintzas rispetende su cuntestu ambientale.

In intro de s’oferta formativa b’at progetos didàticos, addòbios in sas iscolas, materiale informativu e cuncursos chi promovent sa partetzipatzione ativa de sos istudiantes e de sos dotzentes. Su portale Edustrada l’ant aviadu su 2017 sos de sa diretzione generale de su Miur pro s’Istudiante, s’Integratzione e sa Partetzipatzione, in collaboratzione cun su ministeru de sas infrastruturas e de sos trasportos, sa politzia istradale, su dipartimentu de Psicologia de s’Universidade romana de La Sapienza, sa Federatzione tziclìstica italiana, sa Federatzione mototziclìstica italiana, s’Automobile club d’Italia e sa fondatzione Ania.

S’initziativa est de importu mannu sende chi non b’at die chi non si contet de intzidentes istradales. Fintzas de sos intzidentes chi registramus in Sardigna mancari nde faeddent prus pagu in sos telegiornales “natzionales”.