Fùbalu, cras torrat su Cagliari. Oe su derby Olbia-Torres

Fine de chida de interessu mannu pro sos amantiosos de su fùbalu. Torrat sa Sèrie A cun su Cagliari in cherta de artziare sa conca contra a s’Udinese a pustis de sas duas derrotas, s’una in fatu a s’àtera, pro manu de Inter e de Bologna. A su presente sos ruju-biaitos sunt in penùltima positzione cun unu puntu ebbia balangiadu in sa gara de esòrdiu. S'Udinese pro parte sua nch'est duas positziones prus in artu de sos casteddajos gràtzias a duos parègios. Fintzas sos biancu-nieddos sunt chirchende sa prima vitòria issoro, duncas no at a èssere una partida fàtzile. In Sèrie C b'amus imbetzes su derby de su Nord Sardigna cun ambas duas, Olbia e Torres, chi sunt in prima positzione (segunda e tertza petzi su cunsideramus sa diferèntzia de retes in favore de sa Carrarese). Sa classìfica atuale l'ant a mantènnere petzi cun su dòpiu parègiu: unu intre turritanos e gadduresos; s'àteru intre sa prus capolista e sa Vis Pesaro. Eris ant giai giogadu Ancona-Pineto (1-0), Pontedera-Cesena (1-3), Rimini-Juventus (4-3), Spal-Perugia (1-2).