Limba sarda e poesia banaresa su 10 de cabudanni

Sa Poesia banaresa, est a nàrrere unu sero pro ammentare a su poeta eternu Barore Sassu e fintzas pro dare ondras a su poeta vivente Àngelu Porcheddu. Domìniga su 10, Bànari (intre rimas, contos e mùsica) at a mòvere dae sas raighinas literàrias suas proponende una faina culturale chi naschet dae un’idea de s’amministratzione comunale e chi benit a bonu cun s’agiudu de s’isportellu linguìsticu de su Meilogu gestidu dae s’assòtziu Àndala noa. Pro sas 6 de sero est difatis in programma, cun sa collaboratzione de sa Pro loco, un’esecutzione resada e musicada cun s’operadore linguìsticu Mauro Piredda e sos musitzistas Luciano Sezzi (sassofonista) e Andrea Fenu (pianista). Sos tres, chi sos ùrtimos annos ant propostu unos cantos ispetàculos in sardu movende dae sa figura de Bertolt Brecht e dae carchi romanzu comente S’Àrvore de sos tzinesos de Larentu Pusceddu, The Mexican de Jack London e Vingt mille lieues sous les mers de Jules Verne, custa bia bi l’aconcant cun un’allega resada intre sos versos de custos duos banaresos, intèrpretes mannos de sa pòiesis sarda. Sassu, 54 annos cantende in palcu, lu connoschent in totu sa Sardigna pro sas garas suas in pare cun àteros frailàrgios de s’endecasìllabu a bolu (comintzende dae Remundu Piras e Pepe Sozu) e pro su tràgiu teatrale suo unidu a una capatzidade arta de improvisare cuntzetos cumpridos. Porcheddu, cun prèmios e reconnoschimentos in sos cuncursos prus de importu de s’ìsula (dae Otieri a Pasada) est unu intre sos prus cumponidores mannos de meledu in pare cun Giuanne Fiore, Jubanne Piga e àteros maistros de sa literadura in versos. In sos faeddos de su sìndigu Francesco Basciu, «s’eventu punnat a printzipiare caminos e sensibilidades culturales pròpiu movende dae chie at lassadu un’istiga orale e iscrita in bidda e in totu sa Sardigna pro mèdiu de s’impreu creativu de sa limba sarda. Chie si siat pensat a Bànari che a “sa ‘idda de tiu Barore”. E chie si siat, in su mundu de sa poesia a taulinu, bidet in Porcheddu capatzidades mannas de pintare iscenas de messàgios umanos cun isfumaduras diferentes de colores, dae sas dudas de su tempus a sas isperas de sas persones e de sas comunidades». S’apuntamentu est in sa pratzita comunale de Largu Gramsci, agorà tzìvica in tretos de Sa Pramma chi regnat arta in su coro de sa bidda de su Meilogu.