S'Olbia prontu pro s'istajone noa de sèrie C

Aprofundimentu de sa chenàbura - Si de sa Torres ischimus chi est nàschida su 1903, pro sa sotziedade de s’Olbia (chi fintzas issa est pro comintzare su campionadu de sèrie C su 3 in domo contra a su Cesena) b’at una duda.

Sa memòria colletiva chi brotat in sos ammentos de Terranoa movet dae su 1905; sa crònaca giornalìstica de s’annu a pustis, cun un’artìculu nòdidu de La Nuova Sardegna de su 12 de ghennàrgiu: «Anche nel nostro paese s’è formata una società ginnastica che ha preso il nome di Olbia. I giovani sono accorsi numerosi ad iscriversi alla nuova società, e già l’Olbia conta circa cento soci». E semper sos giornales contant chi sos primos carches a sa botza cherent marcados in s’annu 1912: su 19 de làmpadas b’at àpidu in Terranoa «una magnifica partita di foot-ball». Ma sos disafios cun sas àteras iscuadras de su territòriu s’Olbia (Ilva e Audax in Caragnani) los dìsputat a pustis de sa primu gherra mundiale.

Su primu derby contra a sa Torres (pèrdidu in Tàtari 2-0) est de su 4 de santandria de su 1924. Su 19 de abrile de s’annu a pustis est imbetzes s’Olbia a bìnchere 2-1 in su campu “Fausto Noce”. A pustis de unos cantos annos comente Us Terranovese e Gil Terranova, s’Olbia torrat cun su nùmene suo su matessi annu de su règiu decretu chi pertocat su topònimu ufitziale de sa tzitade (Olbia fiat su nùmene antigu). Sos biancos rapresentant una realidade de grandu importu in s’istòria de su fùbalu isulanu. Sas prestatziones suas in sos campionados de sèrie C. S’annu coladu at serradu su torneu abarrende·nche in sa de 13 positziones pro àere bìnchidu petzi 9 de 38 partidas (41 sos puntos totalizados, comente pro sa Torres, chi però nos contat una vitòria in mancu). Sos tifosos de sa tzitade e de sos àteros logos no lis mancant a sos terranoesos e fintzas pro custa istajone l’ant a sustènnere fintzas a s’ùrtimu disafiu.