Otieri, resèssida manna pro "Remembering Isio"
Sàbadu su 14 de santugaine, pagu prus o mancu unu mese in antis de sa manifestatzione finale de sa de sessantabator editziones de su Prèmiu Otieri de literadura, mùsica e poesia si sunt atopadas a teatru, in su tzìvicu de sa capitale de su versu in sardu.
“Rememberin’ Isio”, custu su nùmene de s’eventu ammaniadu dae s’assòtziu Sa Ena cun s’agiudu mannu de su “Premio Ozieri”. Un’ammentu de e pro Isio Saba, impresàriu musicale, bene connotu in s’ambiente de su jazz internatzionale, grande amigu de Lester Bowie, Don Cherry, Max Roach e àteros.
Su sero l’ant abertu sos otieresos Jame’s Juice cun una bella proa de rock de autore intre prog e indie. Su grupu ghiadu dae Paolo Scodino luego ch’at a intrare a istùdiu pro registrare cantones inèditas.
Non podiat mancare sa poesia. A Clara Farina su còmpitu de piscare dae s’archìviu istòricu de sa manifestatzione cun Avrèschida sarda de Giuanne Fiore, Majias de luna de Franco Cocco, Cantzone de chie ch’es fora de Antoni Cossu, duas de Foricu Seche (Terra morta e Istanote in su chelu apo una tanca) e duas de Predu Mura (Prena sa note ‘e crarore e Sos chimbe orfaneddos).
Cristiano Becciu, otieresu, che a Clara Farina fintzas issu giuradu de su Prèmiu Otieri, at chertu imbetzes bufare dae sa funtana biddanoesa de tiu Remundu Piras cun tres sonetos (Arrejonu ‘e duas bistrales, Sa sorte de sas bellas e Mistèriu) e duas otavas de su prus mannu intre sos poetas improvisadores de Sardigna.
Dae sa poesia in sardu a sa poesia in mùsica cun sa trìbide de su contrabbassista Dario Piccioni acumpangiadu dae Jordan Corda (vibràfonu) e Francesco Merenda (bateria). Su New trio s’annu coladu at bìnchidu su Premio Isio Saba in intro de su Festival Jazz in Sardegna, àtera faina de s’impresàriu musicale otieresu.
In su palcu de su tzìvicu sos tres ant propostu bator branos, Motherland, A new Ceiba e, dae s’ùrtimu discu issoro “Hortus del rio” essidu custu istiu pro Filibusta records, Cafè tevere e Green cocoa, totu cantos istèrridos dae su contrabbasista e composidore romanu. Pro serrare in galania sa cover de Chick Corea Bud Powell.
m.p.