"Pula Letteraria", duas dies de fèstival inclusivu

“Pula Letteraria, oltre i confini” est su nùmene de sa prima editzione de su fèstival culturale chi, in programma su 28 e su 29 de custu mese in su teatru “Maria Carta”, punnat a istèrrere «una caminera de connoschèntzia e de iscoberta pro ghetare a terra sas barreras de cale si siat natura pro chi chie si siat la potzat cursare sena cunsiderare sas abilidades personales suas». Presentes sos de s’assòtzius de tzegos, ipovedentes e retinopàticos sardos e su responsàbile de s’istitutu pro surdos de Torinu.

Padrinu de custa prima s'artista e iscritore Dario Vergassola chi at a presentare fintzas su libru suo “Storie vere di un mondo immaginario” (Baldini e Castoldi). Su comintzu sàbadu su 28 a sas 6 de merie cun sos autores Giovanni Follesa, Vanni Lai, Laura Fois e su giai mentovadu Vergassola. Sa manifestatzione sighit domìniga a sas 5 cun sa mesa tunda cun istitutziones “L’autismo e i disturbi visivi”: ant a faeddare Roberto Pili, Donatella Petretto, Giovanni Gusai, Cristina Caboni e Stefano Arrica. A sas 8 su cuntzertu de s’Orchestra de su Teatru Lìricu de Casteddu cun su diretore Andrea Solinas.

m.p.