Raportu Gimbe, sanidade sarda tinta a ruju
![sanidade sarda](/sites/default/files/styles/header_md/public/upload/2023/10/gimbe%20sanit%C3%A0%20sarda.jpg?h=feadb981&itok=WbNHsMJS)
Sa fundatzione Gimbe eris, in ocasione de sa Die mundiale de sa Salude mentale, at presentadu su de 6 raportos suos pro su chi pertocat su Servìtziu sanitàriu natzionale. Sa Sardigna, de bator colores impreados, est tinta a ruju in pare cun àteras chimbe regiones: Sitzìlia, Calàbria, Campània, Molise e Badde de Aosta. «Traitos sos printzìpios postos a fundamentu de su Ssn, universalidade, agualidade».
A bisu de su presidente Cartabellotta àteros sunt sos faeddos crae chi definint su sistema: tempos de isetu prus chi non longos (fintzas sa Corte de sos Contos est intervènnida faeddende de custu), puntos de primu sucursu assachiados, impossibilidade de agatare unu mèigu o unu pediatra in tretos de domo, disagualidades regionales e locales finas a una migratzione sanitària, crèschida de sos gastos familiares pro sas curas impoverende sos traballadores o, deretu, rinùntzia a sas curas matessi. Su Ssn est issu su patziente malàidu, ma su mèigu polìticu chi nos guvernat sighit cun sa terapia fartosa chi lu depotèntziat, chi lu faghet a bìculos, chi aberit sas ghennas a sa sanidade privada.
m.p.