“Remembering Isio”, jazz e poesia sàbadu su 14 in Otieri

Torrat in Otieri sa manifestatzione “Remembering Isio” dedicada a Isio Saba, fotògrafu e promoter otieresu nàschidu 81 annos a como. Mortu su 2013, fiat una persone nòdida in su mundu de su jazz italianu e internatzionale.
A isse, cun su nùmene suo ligadu a sos de Lester Bowie, Don Cherry, Nanà Vasconcelos e a esperièntzias che a sa de s’Art Ensemble of Chicago, l’ant finas dedicadu unu Prèmiu pro sa creatividade e s’innovatzione in cussu gènere lòmpidu a sa de tres editziones in intro de su festival internatzionale “Jazz in Sardegna” dae isse matessi co-fundadu.
In Otieri, invece, s’ammentu sou leat sa forma de s’apuntamentu annuale organizadu dae s’assòtziu culturale “Sa Ena” cun su contributu finantziàriu de su “Premio Ozieri di Letteratura Sarda” e s’agiudu de realtades e istitutziones locales.
“Remembering Isio” est in programma pro sàbadu su 14 in su teatru tzìvicu “Oriana Fallaci” dae sas 8 de sero. In su palcu su New trio de Dario Piccioni (contrabbassu e mùsicas), Jordan Corda (vibràfonu) e Francesco Merenda (bateria), binchidore de su giai mentovadu Premio Isio Saba su 2022. In antis de su live de custa trìbide at a tocare a sos otieresos Jame’s Juice (Paolo Scodino boghe e chiterra, Michele Falzoi chiterra, Emilio Scodino tastieras, Luca Meledina bassu e Piergianni Meledina bateria).
Sos presentes, de pius, ant a pòdere ascurtare unas cantas poesias sardas chi arrichint s’archìviu de su “Premio Ozieri” lòmpidu a sa de 64 editziones suas. Cussos versos, pro s’ocasione, an a esser resados dae sas carenas e dae sas boghes de duos letores de primore: sos giurados de su “Premio” Cristiano Becciu e Clara Farina.
Sa serada, intrada a s’indonu, l’at a presentare Antonio “Pippo” Saba.