Su “Prèmiu Otieri” in sa puntada de sàbadu de “Poesias”

S’istòria e sos protagonistas de su cuncursu literàriu de primore in su programma de Rts
13 Ladàminis 2023
sa puntada de poesias

Sàbadu su 14, a sas 9,15 de sero in su canale 79 de su digitale terrestre, ant a trasmìtere sa prima puntada de su programma “Poesias” de Rts, Radio televisione sarda. Conduidu dae Ottavio Nieddu e dae Anna Cristina Serra, “Poesias” at a èssere s’apuntamentu de cada chida pro sos amantiosos de su versu in sardu cun intervistas e novas in contu de poetas, prèmios e de apuntamentos culturales ligados a su mundu de sa paràula artìstica.

Su coro de custa puntada, trasmìtida finamentas online in sos canales web de Rts, at a èssere su “Prèmiu Otieri” chi ocannu lompet a sa de sessantabator editziones in sessantasete annos de vida (unu intre sos prus annòsigos de Itàlia).

«Mannos - leghimus - sun su prestìgiu e s’importàntzia de su “Prèmiu Otierichi, gràtzias a s’aficu de Toninu Ledda in antis e de Antoni Canale a pustis, at dadu bantu a sa poesia iscrita in limba sarda favorende·nde sa normalizatzione ortogràfica pro mèdiu de s’istèrrida de unas cantas règulas, abberzende s’àidu a sos protzessos de modernizatzione de sa poesia matessi, iscumbatende istiles e limbazos noos.

Semus faeddende, duncas, de un’istòria èpica comintzada su 1956 e chi andat a manu tenta cun s’àteru meressimentu otieresu, su de sessant’annos in antis, de su 1896 cun tiu Antoni Cubeddu, cun sa prima gara ufitziale intre improvisadores. Un’istòria chi in sa puntada de “Poesias” l’an a contare su diretore artìsticu Marco Fenudi e Duilio Caocci, dotzente de s’Ateneu casteddaju e cumponente de sa giuria ghiada dae su Prof. Dino Manca. Intervistados fintzas sos poetas Dante Erriu de Silius e Maria Sale de Tzaramonte cun ambos duos chi an a resare sas poesias issoro premiadas».

© RIPRODUZIONE RISERVATA