A Giangavino Vasco, Natascia Muscas e Dante Erriu su de 64 Prèmios Otieri

Sa cerimònia de sàpadu 18, dae sas 16.30 in su treatu cìvicu, at a serrare sa de sessantabator editziones de su Prèmiu Otieri de literatura sarda. Unu prèmiu a sa carriera e unu ispeciale pro sos emigrados si ch’aggiunghen a sos noe poetas in sos tres pòdios de sas tres setziones bandizadas.

Cuntentu mannu su presidente de s’assòtziu Vittorio Ledda: «Dae su coro torramus gràtzias a totu sas poetas e a sos poetas, a totu sos amigos peri su mundu chi sighin a nos dare inditos de giudu pro chi bi la sigamus, aggiunghende a custu sa raighina de s’ispìritu originàriu de innovatzione contìnua chèrfidu su 1956 dae su babbu de su Prèmiu Otieri».

Pro su chi pertocat sa setzione poesia “Antoni Sanna”, dae sa de tres a sa prima positzione b’amus a Pier Giuseppe Branca cun “Ischìglias”, a Gonario Carta Brocca cun “S’oràculu” e a Giangavino Vasco, su binchidore, cun “Undas”. Su prèmiu a sa carriera andat a Antonio Canu cun “L’Esposa”, in aligheresu.

In riferimentu a sa setzione prosa “Tonino Ledda” binchet su prèmiu Natascia Muscas cun “Àcua trulla”. A sighire Franca Pirisi cun “Su re de su Tullis” e Franco Sotgiu cun “Vida de Belledda”.

Partecipada fintzas ocannu sa setzione “Tra poesia e càntigu” intitulata a Antoni Cubeddu, s’inventore de sa gara uficiale intre improvisadores. Lorenzo Brandinu a banda, chi l’an intregadu su prèmiu ispeciale emigrados cun sa cumpositzione “S’Ispiju”, custu est su pòdiu: in sa de tres positziones Andrea Columbano cun “Bringhisi disiciatu”; in segunda Angelo Maria Ardu cun “Ses revessu”. Oro pro Dante Erriu e sa sua “A is musas bellas”.

Intre sos òspites illustres b’amus a Flavio Manzoni (chi at a retzire su trofeu “Premio Ozieri” ofertu dae sa gioielleria Puggioni a una personalidade «chi apat contribuidu a ispainare s'immàgine de sa Sardigna»), Paolo Angeli (Prèmiu de s’Arte all’Arte intregadu dae sa Provìncia de Tàtari ), Mariolina Cosseddu (prèmiu “Città di Ozieri” ofertu dae sa Pro Loco a una «personalidade de Otieri o de su Territòriu distinta in s'àmbitu de sa cultura»). Unu prèmiu a sa memoria (ofertu dae sa sotziedade BV de su Rimèdiu) andat invece a Enzo Espa pro su vocabolàriu sardu sou.

Est duncas serrende·si sas de sessantabator editziones de su Prèmiu coordinada dae su diretore artìsticu Marco Fenudi e presentada dae Piersandro Pillonca.

Cuntentu mannu fintzas su presidente de sa Giuria Dino Manca: «Arrivamus a custa cerimònia noa a pustis de aer già isperimentadu cun bona resèssida modalidades, registros e limbazos noos. Meda amus fatu in custos ùrtimos tres annos, cun dadivosidade e sacrifìtziu mannos, e galu meda amus a dever fàghere – est cosa chi ischimus pius chi non bene – cun s’agiudu de totu cantos ma ammentende·nos chi a primu de totu bi sun sos poetas cun sa poesia issoro».

m.p.