Morròculas. In Bànari, Otieri e Mara su fèstival de sa literadura pro pitzinnos e pitzocos

Comintzat cras, chenàbura su 17 de santandria in Bànari, sa de bator editziones de Morròculas, su fèstival de sa literatura pro pitzinnos e pitzocos dae sos 6 a sos 11 annos organizadu dae s’assòtziu culturale Àndala Noa e chi at a lòmpere fintzas a Otieri su 26 e a Mara su primu de su mese de nadale.

Dedicados pro intreu a sa promotzione de su libru, sos apuntamentos de Morròculas ant a èssere caraterizados dae leturas, presentatziones, laboratòrios, cunferèntzias, momentos de formatzione pro maistros e educadores e meledos educativos.

Sa tapa de Bànari, progetada in pare cun s’amministratzione comunale (su matessi sas àteras duas), previdet tres initziativas movende dae sas 17.30 in su locale de su tzentru polivalente de carrera de Lamarmora: un’addòbiu cun Stefania Carta, autora itiresa de su libru “Sònnios de Ierru”, regorta de contos e de poesias iscritos dae Grazia Deledda intre su 1891 e su 1930 e ambientados in tempos de Pasca de nadale e in sas festas de ierru; su laboratòriu de libreddos tàtiles cun pabiru e lana “A cucire le storie” cun s’artista Marta Pala de su progetu “Spazioperaria”; s’addòbiu pedagògicu cun sa dotora Monia Satta de s’assòtziu Akròasis in contu de bullismu e cyberbullismu pro maistros, babbos e mamas, educadores, assistentes sotziales, operadores sotziales, ludotecàrios, bibliotecàrios e pro totu sos interessados a s’argumentu (e chi s’at a repìtere fintzas in Otieri e Mara).

«Su tèrmine sardu morròcula – narant sos organizadores – inditat sa “trottola”, in italianu, est a nàrrere cussu giocàtolu connotu in totu su mundu, fatu pro su prus de linna, tostu e a forma de conu cun una punta de ferru in s’estremidade. Est unu gigiu dinàmicu chi mustrat movimentu e vitalidade, sa matessi vitalidade de sos pitzinnos, chi sunt su coro de su fèstival».

Protagonistas de Morròculas ant a èssere fintzas Mamadou M’Bengue (autore de “Il pescatore e la sirena”, un’istòria illustrada pro pitzinnos in programma pro sa tapa de Otieri in pare cun unu laboratòriu de pitura de sa giai mentovada Marta Pala) e Monica Tronci Pau chi, in Mara, at a presentare su libru suo “Il diario di Eleonora D’Arborea” e at a ghiare unu laboratòriu de manìgiu de sa plastilina movende dae sa figura de sa giuighissa.

«S’initziativa – serrant dae Àndala Noa – est nàschida a pustis de unos cantos annos de ideatzione e progetatzione, ca in su nord Sardigna intendìamus sa netzessidade de dedicare unu momentu de promotzione literària pro sos giòvanos».