Vittória a lu di 94! La Torres è ancóra cabbu-listha

No éra cunzéssu. No si pudia pirdhí e no si pudia pareggià. E cu’ la vittória di oggi la Torres è ancóra cabbu-listha di chisthu campionaddu di Lega Pro, pagantu in cumpagnia di lu Cesena chi, dabboi d’abé vintu lu ricúparu cu l’Entella, abia pareggiaddu li conti cu’ li sassarési. Arimani li di Rumagna ani vintu puru contra a la Lucchese, ma cu’ li tre punti pigliaddi i’ lu campu di la Vis Pesaro semmu sempri 33-33. Lu primmu gol è chissu di li paddroni di casa, cu’ Cristian Nina a lu minutu di 33 chi, cu’ un poggu di bonasorthi zi la poni drentu sottu a l’ingruziadda di li pali. Lu parèggiu turritanu i’ lu sigundu tempu cu’ Fischnaller a lu di 66, di cabbu, seividdu da Goglino. E a lu di 94 Fischnaller fazi lu bis. A fóra li pindacci, emmu, ma la Torres débi giuggassi la barretta parchí lu campionaddu è longu assai e lu Cesena è punendi in marrania.