Lapadula? «Unu leader». Pavoletti? «Una cosa de non crèere». Sos tifosos? «Una cosa sola nois e issos»

«Custa vitòria balet un'enormidade, de importu mannu a leare tres puntos oe; e a los leare de custa manera est fintzas prus bellu». Est su chi narat mister Ranieri a pustis de sa vitòria in extremis contra a su Sassuolo. S’allenadore de su Cagliari saludat sos tifosos: «Nos amus a sarvare petzi cun issos, una cosa sola devimus diventare nois e issos». Custu su cummentu pro Lapadula, autore de sa prima rete: «Gianluca est unu pitzocu de oro, unu professionista esemplare, unu leader». E Pavoletti? «Leonardo est una cosa de non crèere, sos gol suos semper graes sunt. Est inchietu ca lu fatzo giogare pagu, ma ischit chi sos sèberos meos sunt fatos pro su bene de s’iscuadra e de sa carriera sua».

m.p.