Torres, lu paréggiu no è basthanti ma li giuggadori vi so

Parthiddi cumenti a chistha, pa’ li tifosi, so appuntamenti chi ni fàzini brinca’ lu córi. La cunquistha di lu tronu, dabboi di l’abè pessu in favóri di lu Cesena, éra l’obbiettivu di la Torres. Li giuggadori di Greco ani fattu una bedda gara i’lu primmu tempu impignéndi li paddroni di casa chi lu tronu no lu vuríani pirdhí (cun Berti chi marcha a lu minutu di 20 ma chi pa’ l’àibitru no éra regurari). I’ lu sigundu tempu Fishnaller paréggia li conti a lu 51, tre minuti addabboi di lu vantàggiu di la cabbu-listha: cross di Scotto, passàggiu di Zecca e lu tiroresu zi la poni drentu fendi cuntenti assai li sassarési in traifertha e li torresini di tutta la Sardhigna. Lu paréggiu no è basthanti ma lu Cesena (ancóra cabbu-listha) no l’illonga lu passu. Li giuggadori di la Torres vi so. E cun chisthu ritmu vi sarani.