Sanidade e territòrios, sa protesta de sa Barbàgia-Mandrolisai

Sa Barbàgia-Mandrolisai est torra in protesta pro una sanidade chi non dat sas rispostas a sos tzitadinos. Custu mangianu una delegatzione de su comitadu territoriale “Sos Sanità” nch’est falada a Casteddu, ogros a sa sede de s’Ares, ammentende sa mancàntzia de sos pediatras in una zona chi contat 14 biddas. «Custa est sa prima protesta – at naradu Bachisio Cadau de su comitadu – contra a un’emergèntzia chi bogat sa salude a sos pitzinnos nostros e sa trancuillidade a sos babbos e a sas mamas. De custa manera sunt violende sos prus printzìpios elementares de su servìtziu sanitàriu natzionale». «Amus faeddadu cun sos dirigentes Ares – at annantu una mama, Franca Salvai – ma non nos ant dadu sas rispostas chi cherimus. Sunt a cumprende a sos bandos ma custas zonas difìtziles sos professionistas non las sèberant, nemmancu cun sos intzentivos».