Fogu in sa presone de Uta, sa garante: «Cussu detenutu non devet istare in cue»

Sa de eris in sa presone de Uta fiat un’àtera die de inferru chi faghet a cumprèndere in cale situatzione bivent sas persones in intro. Sa garante de sos presoneris Irene Testa est intervènnida pro denuntziare sas cunditziones chi ant ingendradu s’acontèssida: «Su fogu postu – at naradu – fiat cosa annuntziada. Apo denuntziadu a sas autoridades cumpetentes e a sas chi se nde diant dèvere fàghere càrrigu chi su presoneri est malàidu grave e chi non diat dèvere istare in galera. A lu nàrrere non so deo ma sas dispositziones de sos ispetzialistas de sos meses colados. Eris amus evitadu una tragèdia gràtzias a su traballu de sa politzia penitentziària chi sufrint a s’ispissu situatziones malas a gestire e in foras de sas cumpetèntzias issoro. No est cosa de atzetare s’idea chi sa galera si fùrriet a parchègiu de sas situatziones difìtziles».

m.p.