In La Caletta torrat su CalaBeer (ocannu fintzas cun su binu) pro sa de 5 editziones

No una festa de sa birra cale si siat, ma un’apuntamentu ue sos birrifìtzios artesanales minudos s’aunint, dae 7 annos a como, a àteras realidades artìsticas e assotziativas de su logu. E como, cun sa mudada de nùmene dae CalaBeer in CalaBeer and Wine, a sas cantinas. «Dae tempus est – narant sos organizadores de s'assòtziu Kawham – chi fìamus pensende a pònnere in parte su mundu de sos binos pro arrichire e nobilitare sa manifestatzione».

De cada manera, s'apuntamentu cun sa de chimbe editziones est pro sa prima die de maju in sa Marina de Thiniscole (La Caletta, in italianu). Totu at a comintzare a banda de mangianu, dae sas 10, dae sa pratza de su Portu finas a sa rugrada intre sas carreras de Nazario Sauro e de Ancona, est a nàrrere sas prus de importu de sa localidade marina nòdida.

Ses sos stand chi amus a agatare manu-manu: Triulada, Arabus Beer, Centoteste, Zemyna, Santu Jorgi, Birrificio agricolo Reforte. Custas postatziones s’ant a intreverare cun òrdine regulare in pare a sas de sas realidades vinìculas Sassu, Binza ‘e su Re, Cantina Giacu, Cantina Giovanni Ladu e Cantina Sorres.

Cun issos fintzas unos cantos puntos espositivos: s’impreu a nou, s’ogetìstica e sos hobbistas de Associazione creativi del Nuorese; sos artesanos de Ceramiche Deiana; sas corbuleddas de Luca Funedda; sos granos antigos de I Grani di Atlantide; s’artesanadu e sos gurteddos de Sergio Corrias. Intre sos puntos de interessu finamentas sos stand de Cosmo, partner mannu de s’eventu cun unu servìtziu de nolègiu cun tzaferru ativu a die intrea, e de sa Rete d’impresa La Caletta, cun informos e merchandising. Totu est coordinadu dae sos organizadores de sa manifestatzione chi ant a àere s’info point issoro frunende assistèntzia, ghia e promotzione de su territòriu.

Prenu fintzas su programma de s’intratenimentu musicale cun duos Dj set (Ozzy e Giove), bator esibitziones live (Made in Japan, Dirty Chease, Mnemonia e Prisma) e una ràdiu web cun trasmissiones in direta, intervistas e mùsica de sos Dj.

Luego amus a ischire finamentas de su cunvegnu programmadu a mangianu. «Che a onni annu – annanghent dae Kawham –, cun s’agiudu de sas impresas locales e de su Comune de Thiniscole, punnamus a promòvere unu modellu de isvilupu sustenìbile a livellu econòmicu, ambientale, e sotziale». Gosi, a pustis de sos addòbios de sas editziones coladas in contu de ambiente e de territòriu, ocannu su tema isseberadu at a èssere su de su traballu.