Sa Die de sa Sardigna in Pasada, Torpè e Lodè
![in Lodè](/sites/default/files/styles/header_md/public/upload/2024/04/photo_2024-04-26_18-53-21.jpg?h=bb5f433f&itok=rcdl6oLA)
Promòvere sa connoschèntzia de s’istòria sarda faghende·la connòschere a sos pitzinnos. Custa fiat sa punna printzipale de sas essidas didàticas chi, mèrcuris su 24 de custu mese, ant interessadu sos alunnos de sas primàrias e de sas segundàrias de primu gradu de su cumprensivu “Eleonora D’Arborea” de Torpè, Lodè e Pasada. In sas tres salas consiliares, sos dotzentes Omar Onnis, Anna Rosa Corda e Isabella Tore ant pòdidu acrarire sas acontèssidas in antis e a pustis de su 28 de abrile de 230 annos a como: dae cando su 1720 pongeint sa corona a sos Savoia intreghende·lis custa terra chi non meressiant a sa derrota de Angioy. «Custu progetu – narat Marco Zirottu, amministradore comunale de Torpè – naschet belle gioghende ma cun una punna crara: sa de fàghere connòschere a sos pitzinnos su chi amus fatu su 28 de abrile de su 1794. E nche los amus giutos a sas salas consiliares pro lis fàghere cumprèndere chi est fintzas in custos logos chi si leant sos disinnos pro su benidore de sas comunidades nostras».