Birra, binu e traballu su 2 de làmpadas in su CalaBeer and Wine de La Caletta

Torrat su 2 de làmpadas in sa Marina de Thiniscole (La Caletta) su Calabeer and Wine, manifestatzione ideada e progetada dae s’assòtziu culturale Kawham. No una festa de sa birra cale si siat, ma un’apuntamentu ue sos birrifìtzios artesanales minudos s’aunint che a semper a àteras realidades artìsticas e assotziativas de su logu. E como, difatis, a sas cantinas.

«Dae tempus est – narant sos de Kawham – chi fìamus pensende a pònnere in parte su mundu de sos binos pro arrichire e nobilitare sa manifestatzione».

Totu at a comintzare a banda de mangianu, dae sas 10, dae sa pratza de su Portu finas a sa rugrada intre sas carreras de Nazario Sauro e de Ancona, est a nàrrere sas prus de importu de sa localidade marina nòdida. Ses sos stand chi amus a agatare manu-manu: Triulada, Arabus Beer, Centoteste, Zemyna, Santu Jorgi, Birrificio agricolo Reforte.

Custas postatziones s’ant a intreverare cun òrdine regulare in pare a sas de sas realidades vinìculas Sassu, Binza ‘e su Re, Cantina Baronie, Cantina Giovanni Ladu e Cantina Sorres. Cun issos fintzas unos cantos puntos espositivos: s’impreu a nou, s’ogetìstica e sos hobbistas de Associazione creativi del Nuorese; sos artesanos de Ceramiche Deiana; sas corbuleddas de Luca Funedda; sos granos antigos de I Grani di Atlantide; s’artesanadu e sos gurteddos de Sergio Corrias.

Intre sos puntos de interessu finamentas sos stand de Cosmo, partner mannu de s’eventu cun unu servìtziu de nolègiu cun tzaferru ativu a die intrea, e de sa Rete d’impresa La Caletta, cun informos e merchandising. Totu est coordinadu dae sos organizadores de sa manifestatzione chi ant a àere s’info point issoro frunende assistèntzia, ghia e promotzione de su territòriu.

Prenu fintzas su programma de s’intratenimentu musicale cun duos Dj set (Ozzy e Giove), bator esibitziones live (Skaosss, Dirty Chease, Clinica e Prisma) e una ràdiu web cun trasmissiones in direta, intervistas e mùsica de sos Dj. E àteru b’at, ca in su CalaBeer costumant a donare momentos de allega e de meledu in contu de fainas in su e pro su territòriù.

«Che a onni annu – annanghent dae Kawham –, cun s’agiudu de sas impresas locales e de su Comune de Thiniscole, punnamus a promòvere unu modellu de isvilupu sustenìbile a livellu econòmicu, ambientale, e sotziale».

A sa dibata, in programma a sas 11 de mangianu in pratza de su portu e moderada dae su giornalista Mauro Piredda, b’ant a pigare parte Marianna Massaiu, formadora e dotzente, laureada in Iscièntzias psicològicas de su traballu, Antonio Satta, sotziòlogu e funtzionàriu regionale de s’Agenzia sarda pro sas polìticas ativas de su traballu, e Sebastiano Pira, consulente, formadore, dotzente in su campu de su food and beverage e sòtziu co-fundadore de Bhospitality.

S’at a faeddare duncas de disocupatzione e de cunsighèntzias sotziales de su fenòmenu, de traballu feminile, de sas oportunidades atuales pro traballadores e imprendidores noos e de sa formatzione comente istrumentu tzentrale pro sa crèschida e s’isvilupu de un’azienda e pro su benèssere de sos dipendentes. Sa dibata l’at a serrare Davide Fais de su diretivu de Kawham cun sos saludos suos (in programma fintzas sos saludos de s’amministratzione comunale)