“Donne vissute in Sardegna” in sa programmatzione de Unica Radio

Oe, su 25 de santandria a sas 10 de mangianu, a sas 2 de merie e a sas 9 de sero, Radio Unica at a trasmìtere “Donne vissute in Sardegna”, unu radiodramma chi movet dae s’òpera omònima de Maria Michela Deriu e chi nch'est in intro de sa rassigna culturale “Fèmminas” promòvida de a su Comune de Casteddu.

Su progetu – leghimus in sa nota de annùntziu – «naschet pro tzelebrare sa fortza, sa resilièntzia e s’identidade de sas fèminas sardas contende istòrias chi ammesturant veridades, assimìgios e irrealidade in unu biàgiu chi tocat su coro de sa cultura isulana». Su radiodramma, adatadu dae Roberta Ferrau, cheret dare boghe a sas figuras femminiles contadas in su libru chi rapresentant in forma simbòlica sa richesa de sa traditzione sarda e su valore istòricu suo. Cada personàgiu mustrat una particularidade de sa prus cumplessa cunditzione femminile evidentziende momentos de sa vida de cada die, batallas personales e legendas populares chi, paris, «pintant un’afriscu fundudu de s’identidade sarda».

Sa registratzione l’ant afidada a Priamo Meloni chi, in pare cun Carlo Pahler, at fintzas contivigiadu su montàgiu dende a su progetu unu ritmu narrativu dende valore a sas interpretatziones de sos atores.