Càntigos e cunfràrias, "Mantènnere" de Diego Pani nche lompet a Venètzia

‘Mantènnere: Custodire il Suono del Sacro’, su documentàriu de s’etnomusicòlogu Diego Pani e produidu dae Talk About Records, nch’est lòmpidu a Venètzia ue, su 5 de nadale, l’ant presentadu in anteprima. Projetadu in intro de sa rassigna ‘Sguardi Musicali’ promòvida dae sa Fondazione Giorgio Cini, sa pellìcula est su frutu de duos annos de chirca esplorende su significadu culturale e sotziale de su càntigu lussurgesu a cuncordu. protagonistas duas generatziones de cantores de sa Cunfrària de su Rosàriu de Santu Lussùrgiu. Su 16 l’ant a presentare in Casteddu e dae su mese de freàrgiu de annoas comintzant sas presentatziones peri sos logos.