Ispeculatzione in sa Nurra, addòbiu su 5 de nadale in Li Punti

Sa Nurra «no est idònea a s’ispeculatzione energètica». Movende dae custa decraratzione, su comitadu territoriale omònimu organizat pro giòbia su 5, a sas 5.30 de merie in s’oratòriu de Li Punti, un’addòbiu in pare cun sa rete Pratobello 24. «Sighimus sa mobilitatzione a pustis de s’abbratzada luminosa a sa basìlica de Sacàrgia pro faeddare de sa de bator colonizatziones de sa Sardigna e pro sensibilizare sos tzitadinos». «Amus a faeddare fintzas – narant sos organizadores – de su resurtadu chi amus otènnidu sende chi sa commissione pro sa Valutatzione de impatu ambientale at botzadu su progetu de su prus mannu impiantu agrivoltàicu mai propostu in totu su territòriu de s’istadu, destinadu a ocupare 1.043 ètaros de sa Nurra (360 megawatt de potèntzia e 82,5 megawatt de acùmulu)». A s’eventu, moderadu dae sa giornalista Ninni Tedesco, bi pigant parte Piero Atzori (in contu de sos progetos chi interessant sa Nurra), Lorenzo Scano (faeddende de desertificatzione), Francesco Guillot (pro su chi pertocat sos arriscos pro s’avifàuna) e Cristiano Sabino (cun una letura crìtica de sos fenòmenos).