NurSind in agitatzione: «In s'Aou de Casteddu su caos organizadu»

Su sindacadu de sas professiones infermierìsticas NurSind at decraradu s’istadu de agitatzione denuntziende sa situatzione grave chi pertocat sos traballadores de s’Azienda ospidalera universitària de Casteddu. «Su chi semus bivende dae meses – at decraradu Luca Casula de sa sigla – est su prus caos totale. In s’Aou b’at un’ispètzia de anarchia, unu “caos organizadu” pro neghe de una dirigèntzia aziendale chi dae meses no est dende rispostas a sos problemas de sos traballadores». A bisu de su NurSind s’elencu de sos problemas est longu contende·bi in mesu su «pagamentu mancadu de su Bonus Covid 2021». «Sos ànghelos de sa pandemia prus chi no alabados, sunt e sighint a èssere befados e sena iscurtu». Ma a custu elencu si b’agiunghet fintzas su de no àere fatu «sa publicatzione e sa seletzione de sos incàrrigos de funtzione e de coordinamentu».