Tres apuntamentos in Biddanoa Monteleone, Atzara e Silanos ammentende a Pàulu Pillonca

Comintzat su 13 de nadale e finit su 20 sa manifestatzione “Sèmidas, sentieri identitari nell’opera di Paolo Pillonca”, unu biàgiu in sos logos sìmbulu de Sardigna ligados a sa vida e a s’òpera sua «pro torrare a iscobèrrere su valore de sas traditziones, de sa poesia e de sa mùsica». Sa prima tapa est in Biddanoa Monteleone, sa bidda de tziu Remundu Piras; duas dies a pusti tocat a Atzara; sa serrada in Silanos, in ue b’est su museu de sa poesia improvisada. In onni apuntamentu b’at a èssere Piero Marras dende boghe a sas cantzones iscritas dae Pillonca. No at a mancare sa poesia cantada, sende chi su giornalista mancadu ses annos a como nde fiat unu de sos prus mannos connoschidores. Sos detàllios los ant a publicare luego in sa pàgina Fb de s’eventu. Organizant sos Comunes interessados cun s'editore Domus de Janas.