A Mine Of Beer: sas birras chi amentant sa Miniera de Bacu Abis

7 Marzo 2020
birras a mine of beer

* Dae sa terra a sa butìllia * – A Mine Of Beer est su nùmene de sa birra mastrina de Crabònia proposta dae sa sotziedade coperativa “Circolo a mine of”. Custa realidade produtiva est nàschida in su 2017 dae sa boluntade de tres sòtzios chi aiant sa punna de si mudare in una “Beer Firm” pro produire birras de calidade chi diant àere àpidu su marcu issoro.

In sa “Beer Firm” si creant sas retzetas e sas mìscias de sas birras chi si cherent produire. Unu traballu de importu mannu, chi si fàghet chirchende s’echilìbriu giustu, su pròpiu chi dat vida a birras de sabore.

circolo a mine of beer

Sas bèvidas a marcu “A Mine Of Beer” si faghent galu in àteros birrifìtzios: su Mediterraneo de Crabònia, su Marduk de Irgoli e su birrifìtziu ispagnolu La Castellara. Semper che semper, cun s’iscopu de verificare sa realizatzione perfeta de sa retzeta, sa coperativa pigat parte a sa birrificatzione de onni idea de birra posta in òpera.

Sas birras A Mine Of Beer sunt ligadas a istrintu a s’istòria de Bacu Abis, sa bidda de miniera de su Meurreddia-Igresienti, su logu in ue sunt nàschidos sos sòtzios de sa coperativa.

Sas bèvidas A Mine Of Beer sunt bator: sa Bakù, sa Emil, sa Roth e sa Cast. Onni birra est pensada pro satisfàghere clientes chi ant gustos diferentes.

Chie isseberat sa Bakù, pro fàghere un’esèmpiu, còmporat una Ginger Blanche. Una bèvida chi si caraterizat pro sos piessignos de sa retzeta , chi at intre sos ingredientes suos su zenzeru, una raighina nuscosa meda, chi pro su sabore, su fragu e sas calidades organoleticas chi la caraterizant est apretziada meda de sas fèminas.

Sa birra Emil, a manera diversa, est una Golden Ale, una birra de 5 grados ispirada a s’istile inglesu. Una bèvida beverina, simple e incubonada pro tempus meda. Sa Emil est una birra chi s’acùrtziat meda a sas birras industriales.

Pro sos chi preferint sas birras a colore de pinnadellu, sa coperativva proponet Roth, una Pacific Ipa cun atzinnos de frùtora. Sa Roth est ispirada a s’istile americanu.

Sa Cast, imbetzes, est una stout, una birra iscura, una brown Porter chi leat ispiratzione dae s’istile britànnicu. Cast est una bèvida beverina chi at nuscos de cafè, tziculate, nutzola e regalìtzia. Papende durches, bufare una tassa de custa birra est s’isseberu giustu pro nde alabare su sabore.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aggiungi un commento