Sa birra mastrina sarda de su birrifìtziu tiesinu Isola

Bèvidas ispantosas fatas cun ingredientes de primore, tènnicas modernas de produtzione e passione meda
17 Marzo 2020
isola birrificio

* Dae sa terra a sa butìllia*– Fàghere birra est sa vida issoro: est gosi ca in su 2017 unu grupu de imprendidores ant dadu forma cuncreta a s'idea bella de fundare su birrifìtziu Isola, una realidade chi oe proponet birra mastrina de calidade.

Nàschidu in unu palatzu antigu chi s'agatat in su coru de Tièsi (bidda de su territòriu de su Mejlogu), custu birrifìtziu promovit puru momentos de atastos e festas privadas.

Totus sas birras Isola sunt fìgias de sa connoschèntzia manna e de s'amori chi Carla Orgiana, sa mastra birraia de su birrifìtziu tiesinu, at pro su mundu de sa birra.

Un'amori chi printzipiat a sos tempos de s'Universidade, cando istudiaiat in Perugia. S'adòbiu cun sa birra est ligadu a un'esàmene a pitzu de sas bèvidas incubonadas, a unu bellu giru in su Cerb ("Centro di Ricerca per l'eccellenza della Birra ") e in diversos tzilleris e a numerosos atastos. Est pròpriu dae inoghe chi tzucat s'aventura professionale de Carla.

birras isola

Unu nùmene una garantzia. Difatis, sa mastra birraia, a pustis de aere istudiadu in Padova at fatu unu cursu de birraiu artesanu in sa Dieffe, e unu cursu de biersommelier in Monaco.

Fantasiosa e cumpetente, Carla Orgiana creat birras interessantes chi ant totus una saboreddu marigosu finale importante.

Est gràtzias a s'istùdiu fitianu e a sa passione sua chi su mercadu podet godire de birras comente sa “Isola American Pale Ale”, sa “Isola Coffee Sthout”, sa “Isola Golden Ale”,sa “Isola Non Filtrata” e sa “Isola Ripils”.

Sa “Isola American Pale Ale” est una bèvida de 5,5 grados de alcol. Una birra ruja, incubonada meda, lèbia, cun nuscos de agrumes chi derivant dae una lupuladura americana. “Isola American Pale Ale” at unu sabore caramellau chi li dat su maltu e chi abacat cun su marigosu de su lùpulu. Su resultadu est una bèvida de sabore ecuilibradu meda.

Morita, sa “Isola Coffee Sthout”, si presentat comente una bèvida chi at un'ispuma durajola chi est che a una crema. Lèbia, buddida pro tempus meda, “Isola Coffee Sthout” at nuscos de ciuculati e de cafei e est una birra beverina e interessante.

In istile inglesu, sa "Isola Golden Ale" est una birra a colore de oro, cun nuscos dìligos de frores e de frùtora. Lèbia e cun unu bellu sabore de maltu chi si cumbinat beni cun su de sos agrumes, chi derivant de sa misciura de lùpulus americanos e ingresos, creende gosi una bèvida frisca, licanza e cun notas marigosas.

Semper in istile inglesu Isola proponet sa “Isola Non Filtrata”. Custa birra a manera diversa de sa "Isola Golden Ale" no est una bèvida colada.

Sa “Isola Ripils”, imbetzes, si presentat comente una birra a sabore de laores e mele, chi at nuscos dìligos de erbàncios. Buddida pagu, custa bèvida si caraterizat pro àere notas marigosas e elegantes.

In fines, ddoe at una birra chi est una festa de frùtora tropicale e agrumes, s'eticheta "Isola Session Ipa" est una bèvida frisca, lèbia e cun pagu gradu de alcol. Una birra cun unu bellu sabore marigosu, beverina e chi nde bogat su side.
 

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Commenti

Bella custa rubrichedda de birras. Consillu puru de fai un articulu asuba de sa birra Nora de Uliana!

Aggiungi un commento