Sa birra mastrina sarda de su birrifìtziu tiesinu Isola

Bèvidas ispantosas fatas cun ingredientes de primore, tècnicas modernas de produtzione e passione meda
17 Martzu 2020
isola birrificio

* Dae sa terra a sa butìllia*– Fàghere birra est sa vida issoro: est gosi ca in su 2017 unu grupu de imprendidores ant dadu forma cuncreta a s'idea bella de fundare su birrifìtziu Isola, una realidade chi oe proponet birra màstrina de calidade.

Nàschidu in unu palatzu antigu chi s'agatat in su coru de Tièsi (bidda de su territòriu de su Mejlogu), custu birrifìtziu promovet momentos de atastos e festas privadas puru.

Totus sas birras Isola sunt fìgias de sa connoschèntzia manna e de s'amore chi Carla Orgiana, sa mastra birraia de su birrifìtziu tiesinu, at pro su mundu de sa birra.

Un'amore chi printzipiat a sos tempos de s'Universidade, cando istudiaiat in Perùgia. S'addòbiu cun sa birra est ligadu a un'esàmene a pitzu de sas bèvidas incubonadas, a unu bellu giru in su Cerb ("Centro di Ricerca per l'eccellenza della Birra ") e in diversos tzilleris e a maicantos atastos. Est pròpriu dae inoghe chi cumentzat s'aventura professionale de Carla.

isola birras

Unu nùmene una garantzia. Difatis, sa mastra birraia, a pustis de àere istudiadu in Padova at fatu unu cursu de artesana birràia in sa Dieffe, e unu cursu de biersommelier in Mònaco.

Geniosa e cumpetente, Carla Orgiana creat birras interessantes chi lassant totus unu saboreddu marigosu importante.

Est gràtzias a s'istùdiu fitianu e a sa passione sua chi su mercadu podet godire de birras comente sa “Isola American Pale Ale”, sa “Isola Coffee Sthout”, sa “Isola Golden Ale”,sa “Isola Non Filtrata” e sa “Isola Ripils”.

Sa “Isola American Pale Ale” est una bèvida de 5,5 grados de alcol. Una birra a colore pinnadellu, incubonada meda, lèbia, cun nuscos de agrumes chi derivant dae una lupuladura americana. “Isola American Pale Ale” at unu sabore caramelladu chi li dat su maltu e chi acabat cun su marigosu de su lùpulu. Su resultadu est una bèvida de sabore echilibradu meda.

Morita, sa “Isola Coffee Sthout”, si presentat comente una bèvida chi at un'ispuma durajola chi est che a una crema. Lèbia, buddida pro tempus meda, “Isola Coffee Sthout” at nuscos de tziuculate e de cafè e est una birra beverina e interessante.

In istile inglesu, sa "Isola Golden Ale" est una birra a colore de oro, cun nuscos dìligos de frores e de frùtora. Lèbia e cun unu bellu sabore de maltu chi si cumbinat bene cun su de sos agrumes, chi derivant de sa misciadura de lùpulos americanos e inglesos, creende gosi una bèvida frisca, licanza e cun notas marigosas.

Semper in istile inglesu Isola proponet sa “Isola Non Filtrata”. Custa birra, a manera diversa de sa "Isola Golden Ale", no est una bèvida colada.

Sa “Isola Ripils”, imbetzes, si presentat comente una birra a sabore de laores e mele, chi at nuscos dìligos de erbàncios. Buddida pagu, custa bèvida si caraterizat pro àere notas marigosas e elegantes.

In fines, ddoe at una birra chi est una festa de frùtora tropicale e agrumes: s'eticheta "Isola Session Ipa", una bèvida frisca, lèbia e cun pagu gradu de alcol. Una birra cun unu bellu sabore marigosu, beverina e chi nde bogat su sidis.
 

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Commenti

Submitted by Marco (not verified) on Fri, 03/27/2020 - 21:38

Permalink

Bella custa rubrichedda de birras. Consillu puru de fai un articulu asuba de sa birra Nora de Uliana!

Aciungi unu cumentu