Sos Garagisti: s'azienda de Sòrgono chi proponet una “band” de binos chi ant sa cara de sos bingiateris chi los faghent

* Dae sa terra a sa butìllia * - Uras, Manca, Macis, Murru. Sunt custus sos nùmenes de sos “Garagisti di Sorgono”, bidda cabu-de-logu de su Mandrolisai.

Sos Garagisti sunt bator amigos, bator pitzocos chi si sunt riunidos in unu garage pro fàghere binu. Onni sòtziu dat a s'azienda vitivinìcola su contributu suo, chi est su resurtu de esperièntzias e istòrias diferentes.

Ghiados dae s'amore pro sa terra issoro, una terra pòbera cun terrinos fatos de granitu biancu e rosa, sos bator amigos traballant sas bìngias pastinadas de sos giajos e de sos babbos issoro. Onni bide at un'eticheta cun un'istòria de annànghere a su balore comune.

Burdaga, Su Boscu, Figu, Pischina, Bau Perdosu, Pardu de Cresia, Ghennargiunei e Sa Sedda sunt sos sartos in ue s'agatant sas bides coltivadas dae sos Garagisti. Sas matas ant un'edade de 60-80 annos e sunt coltivadas a pagu prus o mancu de 550 metros de artària.

Est gosi ca dae s'àghina Cannonau, dae sa Monica e dae su Muristreddu naschent etichetas de primore, binos ispantosos chi dant cuntentu mannu a su paladu. Onni eticheta at sa cara e su sambenadu de chie la faghet. Feti su de chimbe binos, Paris, presentat un'eticheta cun totus sas caras.

Totus sas ampuddas custoint bèvidas de sabore, binos de terroir chi sunt espressione autèntica de una traditzione seculare.

A fàghere cumpangia a Paris, unu binu nieddu produidu de un'issèberu atentu de àghina Muristeddu, ddoe sunt Macis, Manca, Murru e Uras.

Macis est s'eticheta produida dae su garagista Andrea Macis. Custu binu est su resurtu de su traballu de àghina Muristreddu binnennada in duas bìngias: sa de Monti Pischina e sa de Ghennargiunei.
Macis est una bèvida de caràtere, unu binu caente cun tanninos detzisos, bonu pro lu bufare impare a màndigos pòveros ma importantes comente sa minestra de lampatzu, unu màndigu tìpicu de sa zona de Sòrgono.

Manca est su frutu de sa vinificatzione de s'àghina Cannonau de sas bìngias de Renzo Manca; sunt tres bìngias chi s'agatant a 700 metros de artària in zona Burdaga, in Su Boscu e in Figu.
Manca est unu binu nuscosu e saboridu meda, una bèvida echilibrada e elegante òtima cun retzetas cundidas cun bagna de petza.

Murru est fìgiu de sas bìdes de Simone Murru, matas coltivadas in Bau Perdosu e in Pischina. Murru est unu binu fatu cun àghina Monica chentu pro chentu. Caraterizadu dae unu sabore dìligu e carco de nuscos, Murru est unu binu bonu meda chi giughet frischesa e s'acumpàngiat bene cun unu nùmeru mannu de retzetas.

In fines, sas bìngias de Sa Sedda e de Pardu e Cresia, de propriedade de Pietro Uras, sunt sas mammas de Uras, unu blend de àghina Cannonau, Monica e Muristeddu. Su resurtu est una bèvida chi at nuscos de frùtora ruja, fine e echilibrada.