Sos Garagisti: s'atzienda de Sorgono chi proponet una “band” de binos chi ant sa cara de sos bingiateris chi los faghent

Onni bìngia coltivada at un'istòria de annànghere a su balore comune
23 Arbili 2020
garagisti vigne

* Dae sa terra a sa butìllia * - Uras, Manca, Macis, Murru. Sunt custus sos nùmenes de sos “Garagisti di Sorgono”, bidda cabu-de-logu de sa Barbagia 'e Mandrolisai.

Sos Garagisti sunt bator amigos, bator pitzocos chi si sunt reunidos in unu garage pro fàghere binu. Onni sòtziu dat a s'atzienda de binos su contributu suo, chi est su resurtu de esperièntzias e istòrias diferentes.

Ghiados dae s'amore pro sa terra issoro, una terra pòbera cun terrinus fatos de granitu biancu e rosa, sos bator amigos traballant sas bìngias pastinadas de sos giajos e de sos babbus issoro. Onni bide at un'eticheta cun un'istòria de annànghere a su balore comune.

Burdaga, Su Boscu, Figu, Pischina, Bau Perdosu, Pardu de Cresia ,Ghennargiunei e Sa Sedda sunt sos sartos in ue s'agatant sas bides coltivadas dae sos Garagisti. Sas matas ant un'edadi de 60-80 annos e sunt coltivadas a pagu prus o mancu de 550 metros de artària.

Est gosi ca dae s'àghina Cannonau, dae sa Monica e dae su Muristreddu naschent etichetas de primore, binos ispantosos chi dant cuntentu mannu a su paladu. Onni eticheta at sa cara e su sambenadu de chie la faghet. Feti sa de chimbe binos, Paris, presentat un'eticheta cun totus sas caras.

Totus sas ampuddas custoint bèvidas de sabore, binos de terroir chi sunt espressione autèntica de una traditzione seculare.

A fàghere cumpangia a Paris, unu binu nieddu produidu de un'issèberu atentu de àghina Muristeddu, ddoe sunt Macis, Manca, Murru e Uras.

garagisti sorgono

Macis est s'eticheta produida dae su garagista Andrea Macis. Custu binu est su resurtu de su traballu de àghina Muristreddu binnennada in duas bìngias: sa de Monti Pischina e sa de Ghennargiunei.
Macis est una bèvida de caràtere, unu binu caente cun tanninos detzisos, bonu pro lu bufare impare a màndigos importantes comente sa minestra de lampatzu, unu mandigu tipicu de sa zona de Sorgono.

Manca est su frutu de sa vinificatzione de s'àghina Cannonau de sas bìngias de Renzo Manca; sunt tres bìngias chi s'agatant a 700 metros de artària in zona Burdaga, in Su Boscu e in Figu.
Manca est unu binu nuscosu e saboridu meda, una bèvida echilibrada e elegante cun retzetas cundidas cun bagna de petza.

Murru est fìgiu de sas bìdes de Simone Murru, matas coltivadas in Bau Perdosu e in Pischina. Murru est unu binu fatu cun àghina Monica chentu pro chentu. Caraterizadu dae unu sabore dìligu e dae nuscos carcos, Murru est unu binu chi at una frischètzia bona meda e s'acumpangiat bene cun unu nùmeru mannu de retzetas.

In fines, sas bìngias de Sa Sedda e de Pardu e Cresia, de propriedade de Pietro Uras, sunt sas mammas de Uras, unu blend de àghina Cannonau, Monica e Muristeddu. Su resurtu est una bèvida chi at nuscos de frùtora ruja, fine e echilibrada.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aciungi unu cumentu