“Cantina del Bovale di Tuveri Tatiana”: etichetas interessantes chi rapresentant bene su territòriu terrabesu

* Dae sa terra a sa butìllia * - S'agatat in Terraba e si narat “Cantina del Bovale di Tuveri Tatiana”. Est una realidade produtiva giòvana, chi est nàschida dae sa conca de Tatiana Tuveri e de su maridu Marcello Martis. Sa punna issoro est de propònnere binos ùnicos. E gosi est!

Comente podimos cumprèndere dae su nùmene etotu, custa cantina faghet binos dae àghina Muristellu, est a nàrrere dae su “Bovale”, comente si narat sa matessi àghina in limba italiana. In tames, in prus de custa ratza, s'azienda coltivat àteras bides sardas puru: àghina Cannonau, Monica e Vermentinu.

Onni binu a firma “Cantina del Bovale” contat un'ìsula rica de cultura.

Fìgia de una bidda chi at traditziones de bìngias e de binos, custa realidade at bidu sa lughe pro dare continuidade a unu traballu antigu de famìlia. Pro fàghere sas cosas comente si depet, Tatiana e Marcello ant istudiadu e isperimentadu sena pasu. Duncas, a pustis de 10 annos pagu prus o mancu, su progetu de sa cantina at leadu forma e at cumintzadu a caminare.

Su progetu ambitziosu e ladinu est su de costoire una parte manna de su patrimòniu de su territòriu. Tatiana e Marcello lu faghent avalorende sa produtzione, prus a notu sa de su Muristellu. Est pro custa resone chi sa cantina at dadu importàntzia manna a s'amparu de sas bìngias betzas. Sunt bìngias chi oe faghent àghina primorosa. Filosofia de s'azienda est sa de las traballare cun s'obietivu de otènnere dae onni mata una produtzione bassa.

No est totu, pro ite sas atentziones pibincosas sighint in sa binnenna e in sa vinificatzione. Custa, gràtzias a s'impreu de tecnologias modernas, comente su metodu Gaminede (perfetu pro fàghere incubonare sos binos nieddos), e a sa cumpetèntzia manna de s'enologu, donat comente frutu binos de terroir chi respetant s'àghina e su territòriu.

Sa “Cantina del Bovale” produit su binu biancu “Sabbie D’Oro”, una bèvida interessante fatu cun àghina Vermentinu chentu pro chentu. Tra sos biancos agatamos puru s'eticheta “Vanto”, un'ispumante Brut chi nde balet sa pena a lu bufare in sas ocasiones importantes.

Sunt de tastare puru su “Costa Corallo”, unu binu rosadu estremadu fatu cun àghina Muristellu, Cannonau e Monica; su nieddu “Sostantzia”, blend de Monica e Muristellu; su “Sinnos”, unu binu fatu cun Muristellu, Monica e Cannonau; s'"Arcuentu", unu Muristellu in puresa, e fines su "Majorale", produidu feti cun àghina Muristellu e fatu incubonare in cubas de orrole.

Su “Terra Pintada Bovale” est unu binu “Campidano di Terralba DOC” fìgiu de àghina Muristellu chentu pro chentu, e su “Terra Pintada Cannonau” est frutu de sa vinificatzione de àghina Cannonau in puresa.

Sas bèvidas de s'eticheta “Cantina del Bovale” sunt binos de primore chi promovent su territòriu issoro cun sa calidade. No est pro nudda ca sunt binos famados finas foras dae sas lacanas sardas e italianas.