“Cantina del Bovale di Tuveri Tatiana”: etichetas interessantes chi rapresentant bene su territòriu terrabesu

Binos de terroir chi faghent de sa calidade sa fortza issoro
30 Maju 2020
cantina del bovale

* Dae sa terra a sa butìllia * - S'agatat in Terraba e si lamat “Cantina del Bovale di Tuveri Tatiana”. Est una realidade produtiva giòvana, chi est nàschida dae sa conca de Tatiana Tuveri e de su maridu Marcello Martis. Sa punna insoro est de propònnere binos ùnicos. Gosi est!

Comente podimos cumprèndere dae su nùmene etotu, custa cantina faghet binos dae àghina Muristellu, est a nàrrere dae su “Bovale” de sa limba italiana. In tames, in prus de custa ratza s'azienda coltivat àteras bides sardas puru: Cannonau, Monica e Vermentinu.

Onni binu a firma “Cantina del Bovale” contat un'ìsula rica de cultura.

Fìgia de una bidda chi at traditziones de bìngias e de binos, custa realidade at bidu sa lughe pro dare continuidade a unu traballu antigu de famìlia. Pro fàghere sas cosas comente si depet, Tatiana e Marcello ant istudiadu e isperimentadu sena de pàsiu. Duncas, a pustis de pagu prus o mancu de 10 annos, su progetu de sa cantina at leadu pee e caminadu.

Su progetu codissiosu e ladinu de sos cojubes est su de costoire una parte manna de su patrimòniu de su territòriu. Lu faghent avalorende sa produtzione, prus a notu sa de sa bide autòctona, est a nàrrere su Muristellu. Est pro custa rajone chi sa cantina at dadu importàntzia manna a sa salvaguàrdia de sas bìngias betzas. Sunt bìngias chi oe faghent àghina primorosa.

Filosofia de s'azienda est sa de traballare sas bìngias cun s'obietivu de otènnere dae onni fundale una produtzione bassa.

Non est totu, pro ite sas atentziones pibincosas sighint in sa binnenna e in sa vinificatzione. Custa, gràtzias a s'impreu de tennologias modernas, comente su metidu Gaminede (perfetu pro fàghere incubonare sos binos nieddos), e a sa cumpetèntzia manna de s'enologu, donat comente frutu binos de terroir chi respetant s'àghina e su territòriu.

cantina bovale

Sa “Cantina del Bovale” produit “Sabbie D’Oro”, unu binu biancu interessante fatu cun àghina Vermentinu chentu pro chentu. Tra sos biancos agatamos puru s'eticheta “Vanto”, un'ispumante Brut chi nde balet sa pena a lu bufare in sas ocasiones importantes.

Sunt de tastare puru su “Costa Corallo”, unu binu rosadu estremadu fatu cun àghina Muristellu, Cannonau e Monica; su nieddu “Sostantzia”, blend de Monica e Muristellu; su “Sinnos”, unu binu fatu cun Muristellu, Monica e Cannonau; s'"Arcuentu", unu Muristellu in puresa, e su "Majorale", produidu feti cun àghina Muristellu e fatu incubonare in cubas de orrole.

Tra sas etichetas de primore agatamos su “Terra Pintada Bovale”, unu binu “Campidano di Terralba DOC” fìgiu de àghina Muristellu chentu pro chentu, e su “Terra Pintada Cannonau”, frutu de sa vinificatzione de àghina Cannonau in puresa.

Sas bèvidas de s'eticheta “Cantina del Bovale” sunt binos de primore chi promovent su territòriu issoro cun sa calidade. No est pro nudda ca sunt binos famados finas foras dae sas lacanas sardas e italianas.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aciungi unu cumentu