"Tenuta Masone Mannu": binos de terroir chi “cantant” sa Gaddura

* Dae sa terra a sa butìllia * -

In su coro de sa Gaddura, in localidade Su Canale (Monte), a curtzu a Terranoa, naschet una realidade produtiva meravigiosa: sa "Tenuta Masone Mannu".

Manna 60 ètaros de terrino,s chi s'agatant intre sas mitzas de su Limbara, sa tanca de "Tenuta Masone Mannu" at 19 ètaros coltivados a bìngia. Vermentinu, Cannonau, Carignanu, Muristellu e Malvasia sunt sas ratzas de bide chi agatamus tra sos giuales de Su Canale. Sas bides sunt pastinadas a artàrias diferentes e sunt pro su prus autòctonas.

Sas bìngias de sa cantina Masone Mannu sunt creschidas in una terra chi est adata a sa produtzione de binos biancos de primore. Difatis, sa produtzione printzipale est sa de sas mègius espressiones de su Vermentinu de Gaddura e de sa Malvasia.

Mancari chi sa produtzione printzipale pertocat sos biancos; sos binos nieddos puru resessent a s'espressare in manera perfeta, cun echilìbriu e cun agradu.

In Su Canale totu su traballu in bìngia est esecutadu a manu, evitende s'impreu de produtos chìmicos, lassende logu a sos produtos orgànicos e naturales; in prus, cun sa punna de favorèssere sa salude de sas matas e sa calidade de s'àghina, sas produtziones issoro si mantennent bassas.

In sa cantina Tenuta Masone Mannu si faghent binos praghiles de calidade manna. Sunt bèvidas chi bogant notas minerales ladinas in sos binos biancos e nuscos de ispètzias e de frùtora in sos nieddos.

Onni eticheta sighit una'incubonadura in bratzas de atzàrgiu; pro avalorare sas caraterìsticas aromàticas suas, però, su mustu podet pasare in carradas de linna.

Dae custa “fotografia” est craru ca sa filosofia de sa "Tenuta Masone Mannu" at unu ligàmine istrintu cun sos critèrios sighidos dae chie amat sa terra sarda. Pro custa resone totus sas eticas sunt binos de terroir chi ant una personalidade importante. In pagu tempus, difatis, sunt resessidos a conchistare su mundu de s'enologia e de s'imprenta ispetzializada in matèria.

In su catàlogu de sos binos Masone Mannu agatamos sos “Vermentino di Gallura DOCG” Petrizza, Costarenas e Roccaìa; su “Cannonau di Sardegna DOC” Zojosu; s'“Isola dei Nuraghi Rosso IGT” Entu; s'“Isola dei Nuraghi Rosato IGT” Zeluiu, chi est otennidu dae àghina muristellu; e s'“Isola dei Nuraghi Rosso IGT” Zurrìa.

Totus sas bèvidas de custa cantina gadduresa sunt etichetas tìpicas chi faeddant de Sardigna e chi “cantant” sa Gaddura e sas bides suas, chi gosant de su nuscu de su ghinìberu e de sa murta.