Tenuta Masone Mannu: binos de terroir chi “cantant” sa Gaddura

In localidade Su Canale naschet una realidade produtiva chi faghet bèvidas leande in aprètziu sa natura
26 Maju 2020
tenute masone mannu

* Dae sa terra a sa butìllia * - In su coro de sa Gaddura, in localidade Su Canale (Monte), a curtzu dae Terranoa, naschet una realidade produtiva meravizosa: sa Tenuta Masone Mannu.

Manna 60 ètaros e fata de terrenos ingastados tra sas mitzas de su Limbara, sa Tenuta Masone Mannu at 19 ètaros coltivados a bìngia. Vermentinu, Cannonau, Carignano, Muristellu e Malvasia sunt sas ratzas de bide chi agatamus tra sos giuales de Su Canale. Sas bides s'agatant a artàrias diferentes e sunt pro su prus autòctonas.

Sas bìngias de sa cantina Masone Mannu sunt alliongiadas a terrenos chi sunt adatos a sa produtzione de binos biancos de primore. Difatis, sa produtzione printzipale est sa de sas mègius espressiones de su Vermentinu de Gaddura e de sa Malvasia.

Mancari chi sa produtzione printzipale pertennet sos biancos, sos binos nieddos puru resessint a s'espressare a manera perfeta, cun echilìbriu e cun agradu.

In Su Canale totu su traballu in bìngia est esecutadu a manu, evitende s'impreu de produtos chìmicos, lassende logu a sos produtos orgànicos e naturales; in prus, cun sa punna de favorèssere sa salude de sas matas e sa calidade de s'àghina, sas produtziones sunt mantenidas bassas.

In sa cantina Tenuta Masone Mannu si faghent binos piaghiles de calidade manna. Sunt bèvidas chi ant notas minerales ladinas in sos binos biancos e nuscos de ispètzias e de frùtora in sos nieddos.

binos masone mannu

Onni eticheta sighit una'incubonadura in bratzas de atzàrgiu; pro avalorare sas caraterìsticas aromàticas suas su mustu podit però pasare in carradas de linna.

Dae custa “fotografia” est craru ca sa filosofia de sa Tenuta Masone Mannu at unu ligàmine istrintu cun sos critèrios sighidos dae chie amat sa terra sarda. Pro custa resone totus sas eticas sunt binos de terroir chi ant una personalidade importante. In pagu tempus, difatis, sunt resessidos a conchistare su mundu de s'enologia e de s'imprenta esperta in matèria.

In su catàlogu de sos binos Masone Mannu agatamos sos “Vermentino di Gallura DOCG” Petrizza, Costarenas e Roccaìa; su “Cannonau di Sardegna DOC” Zojosu; s'“Isola dei Nuraghi Rosso IGT” Entu; s'“Isola dei Nuraghi Rosato IGT” Zeluiu, chi est otennidu dae àghina muristellu; e s'“Isola dei Nuraghi Rosso IGT” Zurrìa.

Totus sas bèvidas de custa cantina gadduresa sunt etichetas tìpicas chi faeddant de Sardigna e chi “cantant” sa Gaddura cun sas bides suas, chi gosant de su nuscu de su tzinnìbiri e de su de sa murta.

© RIPRODUZIONE RISERVATA

Dae sa terra a sa butìllia

Progetu realizadu cun sa partetzipatzione de sa Regione Autònoma de Sardigna – L.R. LR 22/2018, art. 22

Image
Regione Autonoma Sardigna

Aciungi unu cumentu